Դատավոր Աննա Դանիբեկյանը երեկ մերժեց Ռոբերտ Քոչարյանի պաշտպանների կողմից գործով մեղադրող դատախազ Պետրոս Պետրոսյանին ներկայացված բացարկի միջնորդությունը։
Հիշեցնենք, որ նախորդ նիստին էլ Քոչարյանի պաշտպանները բացարկի միջնորդություն էին ներկայացրել դատավորին, որը ևս մերժվեց։ Իսկ դրանից առաջ կրկին միջնորդություն էր ներկայացվել գրավի դիմաց փոփոխել Քոչարյանի խափանման միջոցը։
Այն, որ այս միջնորդություններով Քոչարյանի թիմը ակնհայտորեն ժամանակ է ձգում, ակնհայտ է բոլորին։ Երեկ նույն Քոչարյանի փաստաբան Հովհաննես Խուդոյանը լրատվամիջոցներից մեկին ասել էր, որ Ռոբերտ Քոչարյանի գործով ՄԻԵԴ-ի եզրակացությունը սպասվում է 2020 թվականի հունվար-փետրվար ամիսներին։
Հիշեցնենք, որ ՄԻԵԴ-ը վարույթ է ընդունել Սահմանադրական դատարանի դիմումը՝ Երևան քաղաքի առաջին ատյանի ընդհանուր իրավասության դատարանի և Ռոբերտ Քոչարյանի դիմումների հիման վրա Սահմանադրական դատարանի կողմից քննության ընդունված գործերով խորհրդատվական կարծիք ստանալու համար։ Ստեղծվել է 17 դատավորից բաղկացած Մեծ պալատ, և մինչև նոյեմբերի 19-ը ժամանակ էր տրվել ՀՀ Սահմանադրական դատարանի դատավարության կողմերին, մասնավորապես Ազգային ժողովին և ՀՀ նախկին նախագահ Ռոբերտ Քոչարյանին՝ ներկայացնելու իրենց դիտարկումները վիճարկվող հարցի վերաբերյալ։ ՀՀ Սահմանադրական դատարանի դիմումով պահանջվող խորհրդակցական կարծիքը վերաբերում է ՀՀ Քրեական օրենսգրքի 300.1 հոդվածի սահմանադրականությանը։ Ռոբերտ Քոչարյանի պաշտպանական թիմն արդեն ՄԻԵԴ է ներկայացրել իր գրավոր դիտարկումները։ Կողմերին հնարավորություն կտրվի նաև առարկություններ ներկայացնել միմյանց դիտարկումների վերաբերյալ, մինչև դեկտեմբերի 4-ը։
Սա այն գլխավոր պատճառն է, որի համար ժամանակ է ձգվում։ Քոչարյանի պաշտպանական թիմը խնդիր է դրել մինչև հունվար-փետրվար ժամանակ ձգել, մինչև կլինի ՄԻԵԴ խորհրդատվական կարծիքը, որի հետ, թերևս, իրենք մեծ հույս են կապում։ Թե հաջորդ դատական նիստին Քոչարյանի թիմը ում է բացարկ ներկայացնելու, հայտնի չէ, բայց դրա բազմաթիվ հնարավորություններ ունի։
Փաստաբան Նորայր Նորիկյանի խոսքերով էլ՝ Քոչարյանի փաստաբանները կարող են տարբեր հիմքերով բազմաթիվ միջնորդություններ ներկայացնել, բայց հենց դա ապացույցն է այն բանի, որ նրանք ժամանակ են ձգում։ «Պետք է արձանագրել մի բան, որ Քոչարյանի պաշտպանական թիմը, դատավարական նորմերի օգտագործման արդյունքում միջնորդություններ ներկայացնելով դատական նիստերը արհեստական ձգձգելով՝ սպասում է ՄԻԵԴ-ի խորհրդատվական կարծիքին։ Ակնհայտ է, որ նրանք հենց այդ նպատակն են հետապնդում։ Այս գործընթացի հիմնական շեշտադրումը սա է»,- «Առաջին լրատվական»-ի հետ զրույցում ասաց փաստաբանը։
Մեր դիտարկմանը՝ ինչ վստահություն ունեն Քոչարյանի փաստաբանները, որ ՄԻԵԴ խորհրդատվական կարծիքը հօգուտ իրենց է լինելու, որ այսպես ջանասիրությամբ հետաձգում են նիստերը, Նորիկյանը պատասխանեց. «Թե ինչպիսի կարծիք կլինի, դժվար է ասել, բայց պետք է արձանագրել, որ ՄԻԵԴ-ի խորհրդատվական կարծիքը չի կրելու պարտադիր բնույթ, այն խորհրդատվական է, և դրա վերաբերյալ վերջնական որոշում կայացնողը Սահմանադրական դատարանն է։ Միաժամանակ ակնհայտ է, որ ՍԴ որոշումը կարող է առանցքային դերակատարություն ունենալ սույն դատավարության հետագա ընթացքի վերաբերյալ»։
Այս համատեքստում գերխնդիր է ՍԴ ճգնաժամի հանգուցալուծումը, քանի որ հենց միայն այս գործով ՍԴ որոշումը կարող է բեկումնային լինել Ռոբերտ Քոչարյանի համար։
Մարտի 1-ի գործով հաջորդ դատական նիստը տեղի կունենա նոյեմբերի 26-ին։