Կիևում ԱՄՆ դեսպանատան աշխատակից Դեյվիդ Հոլմսը Կոնգրեսի Ներկայացուցիչների պալատում իմպիչմենտի գործով մասնավոր լսման ժամանակ ցուցմունքներ տալիս ասել է, որ ԱՄՆ նախագահի հեռախոսազրույցը ԵՄ-ում ԱՄՆ դեսպան Գորդոն Սոնդլենդի հետ կարող էին լսած լինել ռուսները:
Այդ մասին հայտնում է CNN- ը:
Ինչպես ավելի վաղ հայտնի էր դարձել, Սոնդլենդը զրուցել էր Դոնալդ Թրամփի հետ Կիևի ռեստորանից բջջային հեռախոսով:
«Ինձ համար դա տարօրինակ էր: Իմ փորձի համաձայն՝ նախագահի հետ հեռախոսազրույցները շատ զգայուն տեղեկություններ են պարունակում անվտանգության տեսանկյունից, և դրանք անց են կացվում համապատասխան ձևով», – ասել է Հոլմսը:
Ըստ նրա՝ ԱՄՆ-ն ընդհանուր առմամբ ելնում է նրանից, որ ռուսները լսում են Ուկրաինայից հեռախոսազանգերը, մանավանդ որ որոշ բջջային օպերատորներ պատկանում են ռուսական ընկերություններին:
