Ներկայացվել է Երևանի 2020 թվականի բյուջեն, որը Երևանի զարգացման 5-ամյա ծրագրերի հետ միասին աննախադեպ է որակվում։
Չեք ասի՝ ո՞րն է այս բյուջեի աննախադեպությունը․ «Առաջին լրատվական»-ի հարցին Երևանի քաղաքապետի տեղակալ Հայկ Սարգսյանը պատասխանեց․ «Ճիշտն ասած՝ աննախադեպ բառն ավելի շատ լիրիկա է պարունակում, բայց դա փաստերով է հիմնված։ Ես ասեմ, որ, հավանաբար, նկատի է առնվում այն հանգամանքը, որ նախկինում երբևէ մենք չենք ունեցել նախորդ տարվա համեմատ 24 միլիարդով ավելի բյուջե։ Բայց, բացի գումարայինից, այստեղ կան նաև հոդվածային կարևոր դրույթներ, որոնք ևս նախկինում չեն իրականացվել՝ թե՛ եկամուտների մասով, թե՛ ծախսային մասով։ Եթե հաշվի առնենք այն, որ նախորդ տարի մեր քաղաքի բյուջեն կազմել է մոտ 91 միլիարդ, ապա 24 միլիարդը բավական մեծ թիվ է։
Համայնքի բյուջեն ձևավորվում է տեղական հարկերի, տուրքերի միջոցով, նաև այլ ոչ հարկային եկամուտների միջոցով։ Այստեղ կար մեծ չիրացված պոտենցիալ։ Նախորդ տարի մենք բյուջեն կազմելու համար ունեինք 15-20 օր ժամանակ, այսինքն՝ այնպես ստացվեց, որ մենք քաղաքի ղեկավարումն ընդունեցինք նոյեմբեր ամսից, և վերջնական բյուջեն հանրության ու ավագանու դատին հանձնելու համար ունեինք շատ կարճ ժամանակ։ Քանի որ մենք առաջին անգամ էինք ղեկավարում քաղաքը, դրա համար էլ մեզ պետք էր այս մեկ տարին, որպեսզի ունենանք ավելի ներդաշնակ ու իրատեսական ֆինանսական կառավարում։ Հաջողվել է, թե ոչ, չեմ կարող ասել՝ զերծ կմնամ գնահատական, բայց ես լավատես եմ»։
Մանրամասները՝ տեսանյութում։