Այսօր՝ նոյեմբերի 19-ին, Ազգային ժողովը շարունակում է աշխատանքը: Այժմ քննարկվում է Քրեական օրենսգրքում փոփոխություններ կատարելու մասին հարցը:
«Սա այն օրենքն է, որը, կարծում եմ, պիտի անվերապահ աջակցության արժանանա, որը մեկ քայլ առաջ պիտի տանի հեղափոխության տրամաբանությունը»,- հայտարարեց պատգամավոր Արման Բաբաջանյանը:
Նա հիշեցրեց, որ անկախության առաջին տարիներին փորձեր արվեցին արմատախիլ անելու քրեական այս շրջանակները, ինչը մասամբ հաջողվեց. «Սակայն 97-98 թթ. Ռոբերտ Քոչարյանը, ով իշխանության եկավ պալատական հեղաշրջմամբ, չուներ քաղաքական և սոցիալական բազա, և նա ազգայնական կուսակցություններից մեկը դարձրեց իր համար քաղաքական բազա, իսկ քրեական աշխարհը ռուսաստաններից բերեց Հայաստան և դարձրեց իր համար սոցիալական բազա՝ նրանց ամբողջությամբ ընդգրկելով ընտրական գործընթացների մեջ: Այդ տարիներից ազգայինն ու կրիմինալը միախառնվեցին՝ դառնալով քոչարյանական և սերժսարգսյանական վարչակարգերի հենարանը»:
Պատգամավորն անդրադարձավ նաև քրեական աշխարհի ազդեցությանը մեր ինքնիշխանության վրա:
«Բանտում անցկացրած իմ 3.5 տարիների ընթացքում ես չեմ տեսել գեթ մեկ քրեական հեղինակության և օրենքով գողի, որ ցանկանար իր երեխան այդ կյանքով ապրեր: Սա, կարծում եմ, ամենախոսուն վկայությունն է և պատգամը այս խորհրդարանին ամենահնարավոր ու անհնար միջոցներով հիմնավորապես արմատախիլ անելու այդ շրջանակներին»,- իր խոսքը եզրափակեց Արման Բաբաջանյանը:
Մանրամասները՝ տեսանյութում: