«Առաջին լրատվական»-ի տեղեկություններով, հուլիսի 18-ին Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում, մեղադրողի միջնորդությամբ ցուցմունք կտա Արաբկիր համայնքի նախկին թաղապետ, Հանրապետական կուսակցության անդամ Հովհաննես Շահինյանը: Դատարանում քննվող գործը կապված է նրա քրոջ որդու՝ Արսեն Ահարոնյանի և նրա ընկերների մասնակցությամբ տեղի ունեցած աղմկահարույց՝ սպանության ելքով գործի հետ:
Հիշեցնենք, որ ըստ մամուլում շրջանառվող տեղեկությունների, ՀՀ ոստիկանության քրեական հետախուզության գլխավոր վարչության պետ, ոստիկանության գնդապետ Հովհաննես Թամամյանը հեռացվել է իր զբաղեցրած պաշտոնից այս գործի պատճառով. իբր Հ. Թամամյանի անմիջական ցուցումով սպանության մեղադրանքը բարդվել էր ԱԺ նախագահի խորհրդական Հովհաննես Շահինյանի քրոջ որդու վրա, սակայն նա չէր արել: և Հովհաննես Թամամյանն ազատվել էր պաշտոնից, երբ այդ ամենն ինչ-որ խողովակներով հայտնի էր դարձել Սերժ Սարգսյանին:
Սակայն մեր տեղեկություններով, այժմ Հովհաննես Թամամյանն է Հովհաննես Շահինյանի դեմ ցուցմունք տալիս, և այդ հանգամանքներից ելնելով իրավիճակը փոխվում է ի վնաս Հովհաննես Շահինյանի: Թեև հանրապետականները հերքում են, բայց գուցե հենց դրանով էլ բացատրվում է այս տարվա հուլիսի 12-ին տեղի ունեցած խմորումները. Հանրապետական կուսակցության Արաբկիրի տարածքային կառույցի ղեկավար Հովհաննես Շահինյանը կուսակցության՝ հուլիսի 13-ին տեղի ունեցած նիստի ժամանակ իր դիմումի համաձայն վայր է դրել իր լիազորությունները՝ պատճառաբանելով իր զբաղվածությունն ու առողջական խնդիրները, որոնց պարագայում չի հասցնում ժամանակ հատկացնել կուսակցական աշխատանքին:
Իսկ դատարանում հետաքրքրվելու են Հովիկ Շահինյանի կողմից՝ գործով անցնող մեղադրյալ Վռամ Բաղդասարյանին թելադրված «մեղայական» նամակով. դեպքից հետո նա մեղայական բովանդակությամբ նամակ է գրել տվել Վռամին և հանձնարարել, որ փոստով ուղարկի դատախազություն, և եթե սպանության գործով կանչեն՝ մեղայականով ներկայանա նախաքննական մարմնին: Սակայն Վռամ Բաղդասարյանը չի համաձայնել, բայց այդ նամակը վերցրել է, չի պատռել՝ ինչպես հավաստիացրել է նամակով հետաքրքրված Հ. Շահինյանին: Նախորդ դատական նիստի ժամանակ այդ նամակը ներկայացվել է դատարան:
Դատական նիստի ընթացքում, մեղադրյալներից մեկն ի վերջո ասել է, որ Պետրոս Գրիգորյանն է կրակողը եղել… Հիմա, թե որ Հովիկն է ումից փող վերցրել, վերցրել է, թե չի վերցրել, եթե վերցրել է՝ ում է այդ գումարը հասել՝ ինչ նպատակով, և ում չի հասել՝ դեռ հայտնի չէ: