«Ֆինանսական շուկայի ակտիվացման, երկարաժամկետ կտրվածքով զգալի գումարներ ունենալու, ինչպես նաև օտարերկրյա ներդրումներ ներգրավելու համար՝ պարտատոմսերի շուկայում առկա վիճակը գոհացուցիչ չէ»,- համոզված է Հայաստանի արդյունաբերողների և գործարարների միության նախագահ Արսեն Ղազարյանը։ Վերջինս գտնում է, որ այսօր Հայաստանում արժեթղթերի շուկան կայացած չէ։ Այս շուկայի զարգացած չլինելն ու տվյալ ոլորտի պասիվությունը, ըստ Ղազարյանի՝ պայմանավորված է մի քանի գործոններով։
«Բաժնետիրական ընկերությունների մասին օրենսդրությունը փոփոխությունների կարիք ունի, նորմատիվ կարգավորումներով պիտի խթանենք կամ նույնիսկ մի փոքր էլ ստիպենք, որ շուկան կայանա, բացի դրանից մեր դատաիրավական համակարգի թուլությունը ևս մեր շահերից չի բխում, այսինքն՝ վստահություն չկա և դա էլ իր հերթին չի նպաստում դրսից ներդրողներ ներգրավելուն, հետևաբար արժեթղթերի շուկայի տկարությունը մեր տնտեսության թուլություններից մեկն է»,-«Առաջին լրատվական»-ի հետ զրույցում ընդգծեց Արսեն Ղազարյանը։
Վերջինս այս համատեքստում հավելեց նաև․«Մենք այսօր չունենք նաև լավ ձևավորված կուտակային հիմնադրամներ, որոնք ներդրումներ կանեն տնտեսության այս կամ այն ճյուղերում, ուստի այս իմաստով՝ շատ էական է, որպեսզի նախևառաջ խոսվի այս խնդիրների մասին, քարոզվի պարտատոմսեր ձեռք բերելու անհրաժեշտության և տնտեսության վրա դրանց դրական ազդեցության մասին։ Օրինակ՝ Զանգեզուրի պղնձամոլիբդենային կոմբինատը, որը ֆինանսական ռեսուրսների խնդիր չունի, մի քանի շաբաթ առաջ 50 միլիոնի պարտատոմս թողարկեց և վաճառեց շուկայում, որպեսզի այս կերպ ներգրավի ավելի մեծ թվով շահագրգիռ ներդրողների և այդ 50 միլիոնի պարտատոմսը ընդամենը 12 օրում շուկայում արագ սպառվեց․ ես ինքս էլ գնել եմ այդ պարտատոմսերից և ոչ միայն այն պատճառով, որ օրինակ ծառայեմ, այլ նաև ֆինանսական տեսանկյունից՝ դա նաև բավականին շահութաբեր է»։
Հիշեցնենք , որ օրերս վարչապետ Նիկոլ Փաշինյանը Հայաստանում Ամերիկայի առևտրի պալատի ներկայացուցիչների հետ տարեվերջյան հանդիպման ժամանակ անդրադարձել էր արժեթղթերի շուկային, իր հերթին շեշտելով, որ ինստիտուցիոնալ առումով տնտեսության զարգացման համար այս պահին ամենամեծ խոչընդոտներից մեկը արժեթղթերի շուկայի զարգացած չլինելն է։
Մանրամասները՝ տեսանյութում։
