Օրերս մամուլում հրապարակվել էր տեղեկություն այն մասին, որ ՀՀ տրանսպորտի և կապի նախկին նախարար Գուրգեն Սարգսյանը և «Օրինաց երկիր» կուսակցության նախկին նախագահ և ԱԺ նախկին նախագահ Արթուր Բաղդասարյանը կասկածվում են ապօրինի ճանապարհով գույք ձեռք բերելու մեջ։ Ըստ նախնական տեղեկությունների՝ նրանք անօրինական ճանապարհով անհատույց ձեռք են բերել Կոտայքի մարզի Աղվերան համայնքում գտնվող հինգ միլիոն դոլար արժողությամբ պանսիոնատը։
Հայտնի է, որ դեռևս հոկտեմբերի 22-ին ՀՀ քննչական կոմիտեի ՀԿԳ քննության գլխավոր վարչությունում «Հյուսիս-հարավ ճանապարհային միջանցք» ծրագրի մշակման և իրագործման գործընթացում թույլ տրված առերևույթ չարաշահումների դեպքերի առթիվ քննվող քրեական գործի շրջանակներում կալանավորվել էր տրանսպորտի և կապի նախկին նախարար, «Սթոնս» ՍՊԸ աշխատանքները համակարգող Գուրգեն Սարգսյանը։
Եվրոպական համալսարանը, որի ռեկտորն է Արթուր Բաղդասարյանի կուսակից Հեղինե Բիշարյանը, շտապեց հաղորդագրություն տարածել, որով պարզաբանում է, որ ս.թ. նոյեմբերի 15-ին ԶԼՄ-ներով տարածված նյութն առ այն, որ ՀՀ տրանսպորտի և կապի նախկին նախարար Գուրգեն Սարգսյանը, ՀՀ պետական գույքի կառավարման որոշմամբ, Կոտայքի մարզի Աղվերան համայնքում գտնվող մոտ 5 մլն դոլար արժողությամբ պանսիոնատներից մեկը, հակառակ ՀՀ Սահմանադրությամբ նախատեսված կարգի, անհատույց հանձնել է «Օրինաց Երկիր» կուսակցության ղեկավար Արթուր Բաղդասարյանին, իրականությանը չի համապատասխանում: «Նախ նշենք, որ Գուրգեն Սարգսյանը, որպես կապի և տրանսպորտի նախարար, պաշտոնավարել է 2008-2010թթ. ընկած ժամանակաշրջանում և, բնականաբար, ըստ մամուլի տեղեկատվության՝ 2013-ին ոչ միայն չէր կարող որպես նախարար նման գործարք իրականացնել, այլ նաև օրենսդրությամբ չուներ պետական գույք օտարելու որևէ իրավասություն։ Քանի որ վերոհիշյալ գույքը պատկանում է Եվրոպական համալսարանին, հարկ ենք համարում հերքել այդ տեղեկատվությունը և հայտնել հետևյալը. «Կոտայքի մարզի Աղվերան համայնքում գտնվող պանսիոնատը, համաձայն 2011 թվականի դեկտեմբերի 1-ի ՀՀ կառավարության N 1700-Ա որոշման, հանձնվել է «Եվրոպական կրթական տարածաշրջանային ակադեմիա» հիմնադրամին (ներկայումս` «Եվրոպական Համալսարան» հիմնադրամ) և գտնվում է վերջինիս հաշվեկշռում, այսինքն՝ նշված գույքը ո՛չ օտարվել է և ո՛չ էլ վաճառվել։ Քանի որ «Եվրոպական Համալսարան» հիմնադրամը, համաձայն «Հիմնադրամների մասին» ՀՀ օրենքի, շահույթի նպատակ չհետապնդող կազմակերպություն է, իսկ վերջինիս հնարավոր լուծարման դեպքում նրա գույքը դառնում է Հայաստանի Հանրապետության սեփականությունը, ապա պատկերն ավելի ամբողջական է դառնում։ Ավելին, Եվրոպական համալսարանը հանդիսանում է ՀՀ կառավարության որոշմամբ և մասնակցությամբ հիմնադրված և միջազգային մասնակցությամբ հանրային բուհ, հետևաբար, նշված գույքը չի կարող հանդիսանալ որևէ ֆիզիկական անձի, այդ թվում՝ Արթուր Բաղդասարյանի սեփականությունը»:
ՀՀ գլխավոր դատախազի խորհրդական Գոռ Աբրահամյանից հետաքրքրվեցինք, թե ինչպես է վերաբերում գլխավոր դատախազությունը Եվրոպական համալսարանի տարածած հաղորդագրությանը։
«Նյութեր են նախապատրաստվում։ Եթե բավարար հիմքեր ձեռք բերվեն հանցավոր դրսևորումների հատկանիշների մասին, ապա քրեական գործ կհարուցվի, եթե ոչ՝ կկայացվի քրեական գործի հարուցումը մերժելու մասին որոշում»,- արձագանքեց Գոռ Աբրահամյանը՝ հավելելով, որ այս պահի դրությամբ ավելացնելու այլ բան չունի։
Հիշեցնենք, որ 1995-2017թթ․ անընդմեջ ԱԺ պատգամավոր ընտրված և իր հիմնադրած «Օրինաց երկիրը» ղեկավարած Արթուր Բաղդասարյանը 2018թ․ թավշյա հեղափոխությունից հետո հայտարարեց քաղաքականությունից հեռանալու մասին։
