Այսօր՝ նոյեմբերի 18-ին, Ազգային ժողովը շարունակում է աշխատանքը: Այժմ քննարկվում է Կոռուպցիայի կանխարգելման հանձնաժողովի անդամների ընտրության հարցը: Այս հանձնաժողովում 1-ական թեկնածուներ են առաջարկել կառավարությունը, «Իմ քայլը», «Բարգավաճ Հայաստան» և «Լուսավոր Հայաստան» խմբակցությունը և Բարձրագույն դատական խորհուրդը:
«Իմ քայլը» խմբակցությունը Կոռուպցիայի կանխարգելման հանձնաժողովի անդամի պաշտոնում առաջարկել է Էդգար Շաթիրյանի թեկնածությունը:
«Հեռու եմ այն մտայնությունից, որ այս օրենքը կատարյալ է կամ մոտ է կատարելության, բայց հանձնաժողովին վերապահված գործառույթների և լիազորությունների շրջանակը անհամեմատ ավելի լայն է, քան գործող Բարձրաստիճան պաշտոնատար անձանց էթիկայի հանձնաժողովին վերապահված իրավասության շրջանակը»,- հայտարարեց նա:
Թեկնածուն կարևորեց հանձնաժողովի գույքի, եկամուտների և շահերի հայտարարագրերի վերլուծության գործառույթը ապօրինի հարստացման ռիսկերի վերհանման կտրվածքով: «Կարծում եմ՝ հայտարարատուների շրջանակի ընդլայնումը չպետք է լինի ինքնանպատակ,- ասաց Էդգար Շաթիրյանը՝ հավելելով, որ հանրությանը հասանելի է հայտարարագրված տվյալների 15-20 տոկոսը:- Այս հանձնաժողովը դասական իմաստով չի կարող դիտարկվել որպես կոռուպցիայի դեմ պայքարի մարմին, որովհետև կոռուպցիայի դեմ պայքարը ներհատուկ է իրավապահ մարմիններին. այս մարմնին օպերատիվ-հետախուզական միջոցառումներ իրականացնելու իրավասություն չի վերապահվելու»:
Մանրամասները՝ տեսանյութում:
