Եթե «Լուսավոր Հայաստան» խմբակցության պատգամավոր Մանե Թանդիլյանի հեղինակած «Հանրային ծառայության մասին» օրենքի նախագծում փոփոխություններ կատարելու առաջարկը ընդունվի նաև երկրորդ ընթերցմամբ, ապա այդուհետև եկամուտների հայտարարագիր կներկայացնեն նաև համայնքապետները։
Հիշեցնենք, որ նախագիծը նախօրեին արդեն առաջին ընթերցմամբ ընդունվեց։ Նախագծին կողմ է քվեարկել 95 պատգամավոր: Այս փոփոխություններով` եկամուտների հայտարարագիր են պարտավորվում լրացնել բոլոր համայնքապետները: Գործող կարգավորումներով` եկամուտների հայտարարագիր են լրացնում միայն 15 հազար և ավելի բնակչություն ունեցող համայնքների ղեկավարները:
Եթե նախագիծն ընդունվի նաև երկրորդ ընթերցմամբ, ապա օրենքը կգործի 2020 թվականից, հետևաբար, բոլոր համայնքապետները պարտավորված կլինեն եկամուտների հայտարարագիր լրացնել նաև 2019 թվականի համար:
Հայաստանի համայնքների միության նախագահ Էմին Երիցյանը շատ դրական է գնահատում Թանդիլյանի նախաձեռնությունը, նախագիծը՝ համարելով, որ ցանկացած հանրային անձ, պաշտոնյա, պետք է հայտարարագիր ներկայացնի։ Երիցյանը այլ տեղում է խնդիր տեսնում, թե որքանով է ի վիճակի Բարձրաստիճան պաշտոնատար անձանց էթիկայի հանձնաժողովը, հիմա արդեն Կոռուպցիայի կանխարգելման հանձնաժողովն ի վիճակի վերլուծել այդ հայտարարագրերը.
«Հայտարարագրումն ինքնին շատ դրական է։ Բայց հարց է, թե հայտարարագրեր ընդունող մարմինը որքանով կարող է այդ ծավալը վերամշակել, ստուգել, թե արդյոք ներկայացված տվյալները համապատասխանում են իրականությանը, թե ոչ։ Այսինքն՝ խնդիրը զուտ տեխնիկական է։ Մնացած առումներով որևէ սահմանափակում չպետք է լինի։ Հայտարարագիր պետք է ներկայացնեն բոլոր պաշտոնյաները, հանրային անձինք։
Խոշորացված Բերդ համայնքի ղեկավար Հարություն Մանուչարյանը համայնքների խոշորացումից հետո արդեն երկու տարի է՝ հայտարարագիր է ներկայացնում։ «Առաջին լրատվական»-ի հետ զրույցում ասաց, որ եթե համայնքները խոշորացված էլ չլինեին և բնակչության թիվը 15 հազարը չգերազանցեր, ինքը էլի դեմ չէր լինի եկամուտների հայտարարագիր ներկայացնելուն։ «Եկամուտներ հայտարարագրելը, բացի դրականից, վատ կողմ չունի։ Արդեն երկու տարի է՝ հայտարարագիր եմ ներկայացնում և շատ ուրախ եմ, որ ամեն ինչ պարզ է ու թափանցիկ, ոչ մի խնդիր չկա։ Ես թաքցնելու բան չունեմ։ Բայց ես միայն իմ անունից կարող եմ խոսել, չգիտեմ՝ մնացածը ինչ են մտածում այս հարցի վերաբերյալ»,- ասաց Մանուչարյանը։
Հեղափոխությունից հետո հետհեղափոխական թոհուբոհի, ինտրիգների պատճառով հրաժարական տված, ապա արտահերթ ընտրությունների արդյունքում կրկին Ուրցաձորի համայնքապետ դարձած Ռաֆիկ Անդրեասյանն էլ ասաց, որ չի հասկանում եկամուտների հայտարարագիրը պարտադիր դարձնելու իմաստը։ Նրա խոսքերով՝ գյուղացին լավ գիտի, թե իր գյուղի համայնքապետն ինչ ունի. «Դա մեր երկրի առաջնահերթ խնդիրը չի։ Գյուղացին ամեն ինչ էլ գիտի, ամեն ինչ իր աչքի առաջ է կատարվում։ Ես դրա իմաստը չեմ հասկանում»։
Մեր դիտարկմանը՝ որպեսզի համայնքի ղեկավարները համայնքի հաշվին չհարստանան, ինչպես եղել է նախկինում, այլ իր ունեցածը հայտարարագրի և նշի ունեցածի ծագման աղբյուրը, Անդրեասյանը արձագանքեց. «Որ մարդ ուզեցավ գաղտնի պահել իր ունեցածը, էլի կպահի։ Հայտարարագրով բան չի որոշվում։ Ինձ էլ էին նախկինում մեղադրում աշխարհի մեղքերի մեջ, բա ինչի՞ քրեական գործերը կարճվեցին։ Այնպես որ, ես ոչ դեմ եմ, ոչ կողմ եկամուտների հայտարարագիր ներկայացնել։ Ես ավելի առաջնահերթ խնդիրներ եմ տեսնում։ Կրթությունն է առաջնահերթ։ Եթե մարդը կիրթ չեղավ, ոչ մի հարց էլ չի լուծվելու»։
«Իրազեկ քաղաքացիների միավորում» ՀԿ նախագահ Դանիել Իոաննիսյանի խոսքերով՝ թեպետ նախագիծն իրականում ողջունելի է, բայց այն էպիզոդիկ է։ «Բազմիցս ենք խոսել այն մասին, որ Հայաստանում հայտարարագրերի բովանդակության և հարակից օրենսդրությունը չափազանց թերի է և այդ առումով կոմպլեքս փոփոխություններ են պետք, որոնք հակակոռուպցիոն ռազմավարության և դրան կից պլանում ներառված են։ Այնտեղ իսկապես շատ բաներ կան, որոնք պետք է փոխվեն։ Հետևաբար, Մանե Թանդիլյանի նախագիծը ընդհանուր տրամաբանության քայլերից մեկն է, բայց այն էպիզոդիկ է»,- «Առաջին լրատվական»-ի հետ զրույցում ասաց Իոաննիսյանը։
Անդրադառնալով դիտարկմանը, թե հնարավոր չի լինի այդ ծավալի հայտարարագրերը վերլուծել, Իոաննիսյանը այդտեղ խնդիր չի տեսնում։ «Թող հայտարարագիրը ներկայացնի համայնքապետը, հետո եթե ինչ-որ մեկը, մի հետաքննող լրագրող, իրավապահ մարմինները ցանկանան ստուգել, կստուգեն։ Թող այդ հնարավորությունը լինի։ Ապագայում էլ, եթե հակակոռուպցիոն կոմիտե ստեղծվի, որը մասնագիտանա դրա վրա, արդեն հայտարարագրերը ստուգելու հազար ու մի մեխանիզմ կներդրվի։ Այնպես որ, ես կարծում եմ, որ ավելի գլոբալ մոտեցում է պետք հարցին, քան Թանդիլյանի մոտեցումն է»,- եզրափակեց Իոաննիսյանը։
