ՀՀ փոխվարչապետ Մհեր Գրիգորյանը նոյեմբերի 13-ին Ազգային Ժողովում ԱԺ-կառավարություն հարցուպատասխանի ժամանակ անդրադառնալով գազի սակագնի շուրջ Ռուսաստանի հետ տարվող բանակցություններին, հայտարարեց, որ միջանկյալ արդյունք որպես որոշվել է, որ մինչև 2020 թվականի ապրիլի 1-ը գազի սակագնի փոփոխություն տեղի չի ունենալու։ Ըստ փոխվարչապետի՝ բոլորի համար պետք է հասկանալի լինի, որ գազի ներքին սակագինը բաղկացած է առնվազն երեք բաղադրիչներից, երեքն էլ բանակցելի են, խոսքը՝ «Գազպրոմի» սահմանին տրվող սակագնի, հայկական «Գազպրոմի» ներդրումների և ընթացիկ ծախսերի մասին է:
Տնտեսագետ Վահագն Խաչատրյանը համոզված է, որ գազի սակագինը ոչ թե թանկացնելու, այլ հակառակը՝ ըստ տարբեր հաշվարկների՝ ընդհուպ մինչև 20 % նվազեցնելու հիմքեր կան, իսկ Ռուսաստանի հետ այդ բանակցություններն ընթանում են ոչ թե տնտեսագիտական հիմնավորումներով, այլ զուտ քաղաքական բնույթ են կրում։ Սրանից զատ տնտեսագետը շեշտեց նաև, որ պարտադիր պետք է ուսումնասիրել մեր բնակչությանը մատակարարվող գազի սակագնի գոյացման խիստ կասկածելի մեթոդաբանությունը, որից շատ բան ակներև կդառնա։
«Սակագինն իջեցնելու ռեսուրսներ, միանշանակ, կան, իսկ թե այդ նվազումը կլինի 10,15, թե 20 տոկոս, դա կարելի կրկին վերանայել ու կառավարությանը հուշել , իսկ հուշելու ձևերից մեկն էլ այն է, որ «Գազպրոմը» պիտի իր ծախսերը կրճատի, մինչդեռ սակագնի հաշվարկման այսօրվա մեթոդոլոգիան այնպիսին է, որ խրախուսում է սակագնի բարձրացմանը։ Հիմնական առեղծվածը կամ, այսպես ասած, շան գլուխներից մեկը թաղված է հենց այստեղ, պետք է սրանից սկսել»,- «Առաջին լրատվական»-ի հետ զրույցում ընդգծեց Վահագն Խաչատրյանը։
Մանրամասները՝ տեսանյութում։