Սպիտակ տունը հայտարարություն է տարածել, որտեղ ներկայացուցիչների պալատում նախագահ Դոնալդ Թրամփի իմպիչմենթի վերաբերյալ լսումները ժամանակի դատարկ վատնում են անվանել:
Հայտարարության մեջ ասվում է, որ Թրամփի հետագա ճակատագրի վերաբերյալ երկրորդ լսումները Ուկրաինայում ԱՄՆ նախկին դեսպան Մարի Յովանովիչի մասնակցությամբ նույնքան անօգուտ են եղել, որքան առաջինը:
«Դժվար է պատկերացնել ժամանակի ավելի մեծ կորուստ, քան այսօրվա լսումներն էին»,- ընդգծել է Սպիտակ տունը:
Ինչպես նշում են ԱՄՆ նախագահի պաշտոնական նստավայրից, լսումների ժամանակ որևէ ապացույց չի ստացվել, որտեղ խոսվեր Թրամփի մեղքի մասին: Երկրի առաջնորդի իբր հանցավոր գործունեության մասին չի կարողացել պատմել նաև Յովանովիչը: