ՀՀ վարչապետ Նիկոլ Փաշինյանն օրերս հայտարարեց, որ հանձնարարել է Ազգային անվտանգության ծառայությանը ստուգել, թե արդյոք Հայաստանում կան սատանիստներ, կա՞ն սատանայի հետ կապ ունեցող անձինք կամ խմբավորումներ, թե՞ ոչ։ ԱԱԾ տնօրենի ժամանակավոր պաշտոնակատար Էդուարդ Մարտիրոսյանն էլ իր հերթին հաստատեց ԱԱԾ-ին ուղղված վարչապետի այս հանձնարարականը և նշեց, որ արդյունքների մասին առաջիկայում կզեկուցեն։
Թեև վարչապետի այս հայտարարությունը շատերի կողմից հումորով ընկալվեց և բավականին քննարկումների առիթ հանդիսացավ, սակայն հոգեբան Ռուբեն Աղուզումցյանը վստահ է, որ այս հանձնարարականին պետք է շատ լուրջ վերաբերել, քանզի սատանիզմը կարող նաև ազգային անվտանգության խնդիր դառնալ։
«Սատանիզմը պետք է ավելի լայն դիտարկել, այսինքն՝ պետք է հասկանալ, որ այն մարդիկ և այն խմբավորումները, որոնց գործունեությունը վնաս է հասցնում հասարակությանը՝ կարող են սատանիստներ համարվել։ Ցավոք սրտի, այսօր մեզանում սատանիզմն ընկալվում է որպես ինչ-որ շարժում, ինչ-որ հոսանք, սակայն այդ հասկացության բացատրությունն այդքան նեղ չէ և պետք է համապարփակ այն ուսումնասիրել։ Ըստ իս՝ սատանիզմը նաև այն ամենն է, ինչը կարող է մարդուն թե´ հոգեկան, թե´ ֆիզիկական վնասներ պատճառել, հետևաբար այս իմաստով՝ չեմ կարծում, որ վարչապետի հանձնարարությունը պետք է կատակի վերածել, ընդ որում՝ խնդիրն ոչ միայն Ազգային անվտանգության ծառայության տիրույթում է, այլ բոլոր ինստիտուցիոնալ կառույցների, որովհետև սա համակարգային լուծում պահանջող հարց է»,- «Առաջին լրատվական»-ի հետ զրույցում շեշտեց Ռուբեն Աղուզումցյանը։
Վերջինս չնշեց հստակ, թե այդ պրոբլեմն այսօր Հայաստանում ինչ մակարդակի է հասնում, սակայն հոգեբանի խոսքերով՝ այդպիսի անհատներ, այդպիսի խմբեր ու երևույթներ, անշուշտ, կան և դրանց գործունեության հետևանքներն էլ քիչ չեն։
Մանրամասները՝ տեսանյութում։