Լուրեր
«Ղարաբաղ կարպետ»-ն իրացման խնդիր ունի. Ինչից են դժգոհ աշխատակիցները
  • 10:15
  • 2019-11-16
  • Դիտումներ՝ *

«Ղարաբաղ կարպետ» ընկերությունը հիմնադրվել է 2013 թվականին։ Արցախում այն ունի երեք արտադրամաս․ գլխամասը գտնվում է մայրաքաղաք Ստեփանակերտում, իսկ երկու մասնաճյուղերը՝ Շուշի և Ճարտար քաղաքներում։ Ընկերությունը զբաղվում է բացառապես ձեռագործ գորգերի արտադրությամբ։ Մեծամասամբ արտադրվում են հայկական և մասնավորապես տիպիկ արցախյան գորգեր՝ տարբեր ոճերի։ Գորգագործությամբ զբաղվող այս ընկերությունում գործվում են տարբեր խտության գորգեր՝ տեղական բրդյա թելերից։

Ընկերությունում աշխատում են բացառապես կանայք, ովքեր մեծ ուրախությամբ նշում են, որ իրենց ձեռքի աշխատանքով ու արտադրած գորգերի որակով ունակ են բավարարելու անգամ ամենաքմահաճ հաճախորդների պատվերները։ Այսուհանդերձ, հատկանշական է, որ  «Ղարաբաղ կարպետ»-ում վարձատրությունն այնքան էլ գոհացուցիչ չէ։ Այստեղ աշխատող կանայք «Առաջին լրատվական»-ի հետ զրույցում պատմեցին, որ չնայած աշխատանքի ծանրաբեռնվածությանն  ու  մասնագիտական դժվարություններին, միևնույնն է՝ միջին կտրվածքով  վճարվող 80-100 հազար դրամ աշխատավարձը չի բավարարում սոցիալական խնդիրները լուծելու և ընտանիքի հոգսը հոգալու համար։ Կային աշխատակիցներ, ովքեր անգամ ամսական 40 հազար դրամ աշխատավարձ էին ստանում,  իսկ ոմանք էլ այս խնդրի  պատճառով՝  ստիպված մի քանի տեղ աշխատում։

Ընկերության տնօրեն Սևակ Խաչատրյանն իր հերթին տեղեկացրեց, որ  աշխատակիցների վարձատրությունը կախված է օրական գործած գորգի քառակուսի մետրից,  որով պայմանավորված ամսական  աշխատավարձը կարող է հասնել առավելագույնը մինչև 150 հազար դրամի։

«Մեր ընկերությունն այսօր ունի 110 աշխատող։ Չկա, այսպես ասած, ֆիքսված գին, որովհետև հաշվի է առնվում աշխատանքի ծավալը, գորգի խտությունը, քառակուսի մետրը և այլն և այլն, իսկ եթե ընդհանուր արտադրության ծավալները նշեմ, ապա տարեկան այն կազմում է մոտավորապես մինչև 500 միջին չափսի գորգեր։ Մեր ընկերությունը խանութ-սրահ ունի Երևանում, վաճառքի տաղավար ունենք նաև Մոսկվայում և մի քանի ներկայացուցիչներ ունենք աշխարհի տարբեր երկրներում, որոնք գովազդում են մեր արտադրանքը, մեր կայքում ունենք նաև առցանց վաճառքի հնարավորություն, բայց այս ամենով մեկտեղ, իրացման  քանակը, վաճառքի ծավալները շատ մեծ չեն, պահանջարկը լայն չէ»,- ընդգծեց ընկերության տնօրենը։

Վերջինս  համոզված է, որ անկախ առկա դժվարություններից՝ սա արցախյան մշակույթն ու հայկական արտադրանքը  համայն աշխարհին ներկայացնելու  յուրօրինակ ձև է։

 

Մանրամասները՝ տեսանյութում։

  • Դիտումներ՝ *