Кавказский узел-ի փոխանցմամբ՝ վրացական «Վետերանները հանուն վետերանների» կազմակերպությունը և «Հանուն ժողովրդավարության ու նորմալ կյանքի շարժման» նախաձեռնող խումբն այսօր պահանջել են նոր զինծառայողներ չուղարկել Աֆղանստան.
«Վրաստանի կառավարությունը համառորեն փորձում է դուր գալ Արևմուտքին և պատրաստ է ավելացնել Աֆղանստանում ունեցած զինվորական կոնտինգենտը։ Այդ քաղաքականությունը չի նպաստում երկրի պաշտպանունակության ուժեղացմանը։ Իսկ ամենագլխավորն այն է, որ դրա համար չարժե զոհել թեկուզ մեկ զինվորի կյանք»։
Հիշեցնենք, որ մոտ մեկ ամիս առաջ այդպիսի պահանջով հանդես էին եկել վրաց լեյբորիստները, ըստ որոնց՝ Վրաստանն ԱՄՆ-ի ու ՆԱՏՕ-ի համար վաղուց վերածվել է «թնդանոթի մսի արտադրամասի»։
Ներկայումս Աֆղանստանում են գտնվում 900-950 վրացի խաղաղապահներ։ Ցայժմ Աֆղանստանում զոհվել է 9 վրացի զինծառայող։
2012 թվականին Աֆղանստանում գտնվող վրացի զինծառայողների թվաքանակը հասնելու է 1500-ի, որով և Վրաստանը պետք է դառնա ՆԱՏՕ-ի անդամ չհանդիսացող երկրներից Աֆղանստանում ամենամեծ զինվորական կոնտինգենտն ունեցող երկիրը։