ԱԺ պատգամավոր Արման Բաբաջանյանը ֆեյսբուքյան իր էջում գրել է․
Ավելի քան քսան երկրների թվում Հայաստանը դեմ է քվեարկել ՄԱԿ–ի`Ղրիմի վերաբերյալ բանաձևին։ ՄԱԿ-ի Գլխավոր վեհաժողովի հանձնաժողովի նիստում քննարկվել է «Ղրիմի Ինքնավար Հանրապետությունում և Սևաստոպոլ քաղաքում (Ուկրաինա) մարդու իրավունքների հետ կապված իրավիճակը» անվանումով փաստաթղթի նորացված նախագիծը։
Ըստ ՄԱԿ–ի պաշտոնական կայքում հրապարակված տեղեկատվության, բանաձևին դեմ են քվեարկել 23 երկիր` Հայաստանը, Ռուսաստանը, Բելառուսը, Կամբոջան, Կոտ դ’Իվուարը, Կուբան, Հյուսիսային Կորեան, Էրիթրեան, Հնդկաստանը, Իրանը, Ղազախստանը, Ղրղըզստանը, Մյանման, Նիկարագուան, Ֆիլիպինները, Սերբիան, Սուդանը, Սիրիան, Ուգանդան, Վենեսուելան և Զիմբաբվեն։ Բանաձևի նախագիծը վերջնական քվեարկության կդրվի դեկտեմբերին կայանալիք ՄԱԿ-ի Գլխավոր Վեհաժողովի հանձնաժողովի նիստում։
Այսպիսով, հերթական անգամ Հայաստանը ՄԱԿ-ում քվեարկում է Ռուսաստանին հաճո կերպով՝ հայտնվելով աշխարհի հետադիմական երկրների հետ նույն շարքում: Ժամանակ առ ժամանակ Ուկրաինային Ադրբեջանի հետ հարաբերությունների սերտացման, զենքի վաճառքի մեջ մեղադրող Հայաստանը այս էլ որերորդ անգամ դեմ է քվեարկում այդ երկրի համար կենսական, անվտանգային նշանակություն ունեցող բանաձևին: Ակնհայտ է, որ այդ քվեարկությունը որևէ կերպ չի փաստարկվում կամ հիմնավորվում Հայաստանի պետական շահով, այլ ընդամենը նպատակ ունի աջակցել Ռուսաստանին:
Այս գործեալոճը տարիներ շարունակ կիրառում էին նախկին իշխնանությունները՝ արժանանալով կոշտ քննադատության նաև նրանց կողմից, ովքեր այսօր իշխանության կազմում են և մշակում ու իրականացնում են Հայաստանի արտաքին քաղաքականությունը: Այսպիսով, Հայաստանը հերթական անգամ իր քվեարկությամբ հայտնվում է աշխարհի հետնախորշում գտնվող երկրների հետ նույն հարութությունում՝ չօգտվելով անգամ գոնե ձեռնպահ քվեարկելու հնարավորությունից:
Արտաքին քաղաքականության որակը չի որոշվում գեղեցիկ ելույթներով ու ճառերով:
Արտաքին քաղաքականության արդյունավետության ու ինքիշխանության գնահատման ցուցիչները նաև տվյալ երկրի քվեարկություններն են միջազգային կազմակերպություններում, առաջին հերթին՝ ՄԱԿ-ում: Իր այս քվեարկություններով Հայաստանը շարունակում է վարել ոչ ինքիշխան, ոչ պետականակենտորեն արտաքին քաղաքականություն՝ սոսկ Ռուսաստանին դուր գալու նպատակով: Այս քվեարկություններն են նաև, որ մեզ համար կարևոր, կենսական նշանակություն ունեցող հարցերում մենք հաճախ մնում ենք միայնակ կամ լավագույն դեպքում վերը բերված ցուցակի հետամնաց երկրների ընկերակցությամբ՝ աշխարհի մնացյալ հատվածին մեղադրելով մեր խնդիրներին անհաղորդ լինելու ու մեզ չաջակցելու մեջ:
https://www.facebook.com/babajanyana/posts/2846085805422128?__xts__[0]=68.ARAQ-974M7lB0nx2bviuQSx_rwE2dU7bLmX6deAapDGG4JQ0-YFQrZPBO9p4CWR2NA1-zHKY9e0Q4e6hDw2oO3xPEOpWrN3hEugrRVz_fsRS3KPcgA2qPW3rD27-4M2VaovjejdHhnFV0COV7MICcHMUubELLndynYkN3BTvZt3N-79r4AN8bdpEb7KF4gOmu1MJn2zONtBYE8SkAELAKaL4PHYzI1LHlMlgCsRIOR9YWCxJiyrIJxykpEW1xCD_OPlnJJv0h1p6dVJ-BgT3aNW6agCwEYarmZc7qJTjBdO2TvYfZFa1g47-pbPtmEzVTeU7FrXzCJzpyZCQE72tQ_WwiviQYXrwWVf-g99TwwNE1rLF-iTrHTo62g&__tn__=-R