Չինական Շենչժեն քաղաքի բնակչուհու ձախ աչքը կուրացել է սմարթֆոնից չափից ավելի օգտվելու հետևանքով, հաղորդում է Unilad-ը:
Աղջիկն ամբողջ գիշեր խաղացել է բջջային հեռախոսով: Հաջորդ առավոտյան արթնանալով նա կրկին վերցրել է սմարթֆոնը, բայց հինգ րոպե անց հասկացել է, որ ոչինչ չի տեսնում ձախ աչքով:
Չինուհին դիմել է հիվանդանոց: Նրա բժիշկը՝ Ցյու Վանցզյանը, հաղորդել է, որ նրա ցանցաթաղանթի վրա արյան մակարդուկներ կան, որոնց պատճառով նա չի տեսնում:
Հիվանդի մոտ Վալսալվայի ռետինոպաթիա են ախտորոշել: Բժիշկը բացատրել է, որ աչքերի գերլարումը հանգեցրել է արյունատար անոթների քայքայմանը:
Լազերի միջոցով բժիշկները փոքրիկ անցք են բացել ցանցաթաղանթի վրա, ինչը հնարավորություն է տվել հեռացնել կուտակված արյունը: Չինուհին ապաքինվում է բուժընթացից հետո, նրա տեսողությունը վերականգնվել է:
