Լուրեր
ԱԱԾ հաղորդագրությունը՝ լակմուսի թուղթ. երեխաների առքուվաճառքով զբաղվողների բանդա է գործել
  • 21:15
  • 2019-11-14
  • Դիտումներ՝ *

Ազգային անվտանգության ծառայությունը բացահայտել է օտարերկրացիների կողմից հայաստանյան օրենսդրության կոպիտ խախտմամբ բազմաթիվ երեխաների որդեգրման դեպքեր: Ըստ ձեռք բերված փաստական տվյալների՝ Հայաստանի երկու քաղաքացիներ, օգտագործելով իրենց կապերը հանրապետական մանկաբարձական հաստատություններից մեկում, մի շարք գերատեսչություններում, ինչպես նաև մանկատներում, երկրի օրենսդրության կոպիտ խախտմամբ կազմակերպել են Հայաստանի քաղաքացի հանդիսացող երեք տասնյակից ավելի երեխաների որդեգրումները խնամքը ստանձնած Իտալիայի Հանրապետության քաղաքացիների կողմից:

Թեմայի շուրջ «Առաջին լրատվական»-ի հետ քննարկմանը մասնակցեցին «Իմ քայլը» խմբակցության պատգամավոր Համազասպ Դանիելյանը, վերլուծաբան Գոռ Մադոյանը, «Քաղաքացու որոշում» կուսակցության գերագույն մարմնի անդամ Հայկ Սահակյանը:

«Երեխաների որդեգրման ոլորտում բացթողումների մասին խոսակցությունների մակարդակով լսել էինք վաղուց: Բնական է, որ խողովակներ են գործել, և եթե հաստատվի այս հանցագործությունը, ապա հանգիստ կարելի է ասել, որ բանդա է գործել: Այստեղ գործ ունենք ոչ պաշտոնական և պաշտոնական անձանց հետ, որոնք հաճախ իրենց հանցագործությունը իրականացնելու համար օգտագործել են մայրերի խոցելի լինելու, երեխաների հիվանդ լինելու հանգամանքը. դա խնդրահարույց հարց է»,- նշեց Համազասպ Դանիելյանը:

«ԱԱԾ այս հաղորդագրությունը լավագույն լակմուսի թուղթն է այն մասին, որ տարիների ընթացքում մի խումբ մարդիկ, օգտվելով հանրային տրամադրությունից, արժեհամակարգային խնդիրներից, հանցավոր գործունեություն են իրականացրել»,- նշեց Գոռ Մադոյանը՝ հավելելով, որ կային շշուկներ, որ 10 000 դոլար կաշառք էին ուզում առողջ երեխա որդեգրելու պրոցեսը կազմակերպելու համար:

«Երեխաները դարձել են առքուվաճառքի առարկա: Այսպիսի կեղտոտ գործարքը չէր կարող աննկատ մնալ, օրենք խախտելը հեշտ բան չէ: Սա պատահական չի եղել, տասնյակից ավելի երեխաների մասին է խոսքը, դա նշանակում է, որ այդ գործունեությունը համակարգային բնույթ է կրել, դա բիզնես է եղել, և եղել է այն ժամանակ, երբ ընտանիքը սրբություն է համարվել»,- նշեց Հայկ Սահակյանը՝ հավելելով, որ այն ժամանակ էլ դրա մասին չէր կարող չիմանալ ԱԱԾ-ն, իմացել է, պարզապես չի բարձրաձայնել:

Մանրամասն՝ տեսանյութում:

  • Դիտումներ՝ *