Ժամանակ առ ժամանակ մշակութային ոլորտում ծագում են խնդիրներ, արվեստագետները դժգոհում են ոլորտի անկատարությունից, օրենքների բացակայությունից: Ի՞նչ է անհրաժեշտ, որպեսզի մշակույթի ոլորտը զարգանա, արդյո՞ք դրան կարելի է նպաստել միայն օրենսդրական ճանապարհով, թե այլ ավելի խորքային խնդիրներ կան լուծելու: «Առաջին լրատվական»-ի հետ զրույցում անդրադռանալով այս հարցերին՝ Կրթության, գիտության, մշակույթի և սպորտի փոխնախարար Նարինե Թուխիկյանն ընդգծեց. «Անշուշտ, օրենքները կարևոր են, չկան օրենքներ մշակույթի տարբեր ճյուղերի վերաբերյալ, բայց հիմա գործընթացներ են սկսվել, ստեղծվում են կինոյի մասին օրենքը, թանգարանների մասին օրենքը… Օրենսդրական կարգավորումները շատ կարևոր են, բայց որևէ օրենսդրական կարգավորում կամ օրենքի դրույթ չի կարող փոխել մեր մտածողությունը, այսինքն՝ շատ կարևոր է, որ մեր հասարակության միտքը բացվի և իներցիոն ընկալումները, որ բավականին տևական ժամանակ է կան, փոխվեն: Մինչև մարդն իրեն չազատագրի կաղապարներից, արվեստի որևէ գործ ընկալելու կաղապարվածությունից՝ որևէ օրենք նրան չի օգնի»:
Նարինե Թուխիկյանի դիտարկմամբ՝ հիմա հասարակության բողոքները հիմնականում բողոք են առաջադիմության դեմ. «Կշռաքարեր են կախում, որպեսզի առաջ չգնանք, բայց ամեն ինչ փոփոխվում է, առաջ է գնում, և անիմաստ է ժամանակի և փոփոխությունների դեմ պայքարելը: «Ազատությունից վախենում են միայն կատարածուները,- նշեց մեր զրուցակիցը:- Չի կարելի խոչընդոտել ստեղծագործական թռիչքը»:
«Դեռևս Թումանյանն էր ասում, որ ազգայնականությունը կործանարար է ցանկացած ազգի համար»,- նշեց մեր զրուցակիցը:
Անդրադառնալով մշակութային ոլորտի աղմկահարույց իրադարձություններին, մասնավորապես մեծ աղմուկ բարձրացրած և դիմադրության արժանացած «Մել» վավերագրական ֆիլմին, որը պատմում է սեռափոխված ծանրամարտիկ Մելինե Դալուզյանի մասին, Ն. Թուխիկյանը նշեց. «Ֆիլմը դեռ պատրաստ չէ, և որևէ մեկը չի տեսել: Այսինքն՝ հասարակության մի մասը քննադատում է մի բան, որից գաղափար չունի, թե ինչ է: Չի բացառվում, որ այնտեղ կբացահայտվի մարդկային սոսկալի ճակատագիր՝ շատ ազդեցիկ, և չի բացառվում, որ այս աղուկ բարձրացնող մարդիկ ուրախանան, որ հերոսը երջանկացել է…»:
Մանրամասն՝ տեսանյութում:
