«Առաջին լրատվական»-ի խմբագրություն էր դիմել Տավուշի մարզի Չինչին համայնքի վարչական ղեկավար Կարեն Դարբինյանը, որի պատմությունը ներկայացնում ենք ստորև։
«2016թ․ դեկտեմբերի վերջին ինձ զանգահարել են, հարցրել՝ Չինչինի գյուղապե՞տն եք (այն ժամանակ համայնքները դեռ խոշորացված չէին), ասել եմ՝ այո։ Հետո ասացին, որ ծրագրեր են իրականացնում «Ապավեն համայնքներին» բարեգործական հասարակական կազմակերպության անունից։ Նառա անունով մեկը ներկայացավ որպես աշխատակից, ասաց, որ ուզում են իրականացնել գյուղատնտեսական, անասնապահական, շինարարական ծրագրեր, իսկ դրա համար պետք են ներդրումներ։
Տարիներ առաջ այդ կազմակերպությունը մեր գյուղում ծրագիր էր իրականացրել։ Ես վճարել եմ 500 հազար դրամ, որը պետք էր ծրագրում ընդգրկվելու համար, տոներից հետո պետք է արդեն սկսվեին աշխատանքները և կատարվեին ներդրումները։ Կար գյուղն ասֆալտապատելու ծրագիր, գյուղը մինչև հիմա ասֆալտապատված չէ։ Այդ պատրվակով իրենք խաբելով՝ գումարներ վերցրին, իսկ ժամանակի ընթացքում այն հասավ 185 հազար ԱՄՆ դոլարի։ Իրենք ասում էին, որ իրենց հաշիվները կալանքի տակ են։ «Ապավեն համայնքներին»-ը լավ համբավ ուներ գյուղում, բոլորը ճանաչում էին, ճանաչում էին նաև Նառա Ղազումյանին, որը ժամանակին գյուղում աշխատում էր «Ապավեն համայնքներին» բարեգործական կազմակերպության անունից։ Հետո նա, պարզվում է, որ դուրս է եկել այդ գործից, խումբ են կազմել և սկսել խաբել ժողովրդին՝ կազմակերպության անունը շահարկելով։ Հիմա ընթանում է նրա դատավարությունը, քանի որ բազմաթիվ մարդկանց է խաբել Նառա Ղազումյանը։ Ինձնից վերցրել էին 185 հազար ԱՄՆ դոլար, որից վերադարձրել էին 2800 ԱՄՆ դոլարը։ Հիմա Իջևանի ընդհանուր իրավասության դատարանում դատն է ընթանում։ Հիմա մենք բողոքում ենք, որ այդ խմբի ապօրինությունները բացահայտվեն, գումարը բռնագանձեն, որպեսզի մենք էլ կարողանանք մեր պարտքերը փակել։ Պետք է բացահայտվի այդ հանցավոր խմբի գործունեությունը։ Իսկ Նառա Ղազումյանին ձերբակալեցին հեղափոխությունից հետո, նա հիմա կալանքի տակ է»։
Փորձեցինք մեկնաբանություն ստանալ նաև «Ապավեն համայնքներին» բարեգործական հասարակական կազմակերպությունից, սակայն տեղեկատուում գրանցված քաղաքային միակ հեռախոսահամարից չպատասխանեցին մեր զանգերին։
