«Ստուգումներն արդեն սկսվել են, ես ոչ մի վախենալու բան չունեմ, ոչ մի մտավախություն չունեմ»,-«Առաջին լրատվական»-ի հետ զրույցում ասաց Եղեգնաձորի քաղաքապետ Դավիթ Հարությունյանը։
Հիշեցնենք, որ Կառավարության այսօրվա նիստում Վարչապետ Նիկոլ Փաշինյանը հայտարարեց, որ ՊՎԾ-ին հանձնարարել է ստուգումներ իրականացնել Եղեգնաձորի քաղաքապետարանում։ «Նախորդ կիրակի օրը մենք Գորիսում, Վայքում ու Եղեգնաձորում եղանք ու խառը տպավորություններով վերադարձանք այնտեղից։ Ես հանձնարարական եմ տվել Պետական վերահսկողական ծառայությանը ստուգումներ իրականացնել Եղեգնաձորի քաղաքապետարանում, որ պարզենք՝ ինչ է կատարվում», – ասաց Նիկոլ Փաշինյանը: Վարչապետը նշեց՝ չնախատեսված այցերով գնալու է մարզեր ու տեսնի, թե իրեն հետաքրքրող սուբվենցիոն ծրագրերը ո՞նց են իրականացվել: «Եթե հանկարծ պարզվեց, որ ինչ-որ բան էն չի, ընդունող հանձնաժողովը, ընդունող պաշտոնյաները պետք է իմանան, որ հավասարազոր պատասխանատվություն են կրում», – ասաց Փաշինյանը:
Հիշեցնենք, որ անցած կիրակի Եղեգնաձորի ԲՀԿ-ական քաղաքապետ Դավիթ Հարությունյանը 25 րոպե շարունակ վարչապետ Նիկոլ Փաշինյանի հետ Եղեգնաձորի փողոցներով շրջելով այդպես էլ չկարողացավ ցույց տալ, թե սուբվենցիոն ծրագրի շրջանակներում ինչ աշխատանք է կատարվել և ինչու է կատարված աշխատանքն էլ այդքան անորակ։ Վարչապետը ոչ մի կերպ չէր հասկանում, թե ինչու է բակային ասֆալտապատումն այդքան անորակ, ով է կատարել, որ ընկերությունը և ինչու աշխատանքը չի հասցրել ավարտին։ «Տպավորություն է, թե ասֆալտ է դուրս գրված, ոչ թե ասֆալտապատում է իրականացվել։ Գլխառադ է արված` հին, բարի ժամանակների նման»,-ի պատասխան քաղաքապետի դիտարկումների, թե աշխատանքները դեռ չեն ավարտվել, ասաց վարչապետը։
Մեր դիտարկմանը, եթե մտավախություն չունի, որ ինչ-որ բան կհայտնաբերվի ստուգումների ժամանակ, այդ դեպքում ինչի՞ վրա են ծախսվել սուբվենցիոն ծրագրի համար կառավարության տրամադրած գումարները, Հարությունյանը պատասխանեց. «Ես չգիտեմ, ինձ նման բաներ մի հարցրեք»։
Մեր հաջորդ դիտարկմանը, որ վարչապետն ինքը արձանագրեց, որ սուբվենցիոն ծրագրի շրջանակներում «գլխառադ է» արված ճանապարհների նորոգումը, բակերի բարեկարգումը, լույսերի տեղադրումը, քաղաքապետն արձագանքեց. «Ով է ասում, որ չարաշահում է եղել, դեռ ոչ մի ծրագիր էլ չի հանձնվել։ Մնացած հարցերը գրավոր ուղարկեք՝ կպատասխանենք»,-ասաց Հարությունյանը՝ անջատելով հեռախոսը։
Ավելի վաղ Վայոց ձորի նորանշանակ քաղաքապետ Արարատ Գրիգորյանը «Առաջին լրատվական»-ի հետ զրույցում ասել էր, որ խորհրդակցություն է անցկացրել քաղաքապետի, աշխատակիցների, շինարարների և այլ պատասխանատուների հետ, հասկանալու համար, թե որն է խնդիրը, ով է թերացել, ինչում է թերացել։ «Ընդհանուր պատկեր ունենալու համար բազմաբնույթ աշխատանքներ եմ իրականացրել։ Այս պահին չեմ կարող ասել ով է մեղավոր, ով է անմեղ։ Պետք է ուսումնասիրություն կատարվի և փաստաթղթային, և իրավական և ընդհանուր կհասկանանք, թե որտեղ ով է թերացել, թերացումն ինչ բնույթի է եղել և դրա հետևանքը ինչ է լինելու»,-ասել էր Գրիգորյանը։
