Այսօր՝ նոյեմբերի 14-ին, Ազգային ժողովում շարունակում է քննարկվել 2020թ. բյուջեի նախագիծը:
«2020 թվականին նախատեսվել է ՀՆԱ իրական աճի 4.9 տոկոս: Ակնկալվում է հարկեր-ՀՆԱ ցուցանիշի մինչև 0.3 տոկոսային կետով աճ մինչև 22,6 տոկոս մակարդակ»,- հայտարարեց ԿԲ նախագահ Արթուր Ջավադյանը:
Նրա խոսքով՝ ԿԲ-ն շարունակելու է վարել ընդլայնող դրամավարկային քաղաքականություն՝ տարվա ընթացքում ավելացնելով ընդլայնման չափը և նվազեցնելով վերաֆինանսավորման տոկոսադրույքը:
ԿԲ նախագահը նշեց՝ արտահանման իրական աճը կշարունակի գերազանցել ներմուծման իրական աճին:
«Նախանշվել է ընթացիկ ծախսերի աճի սահմանափակում և պետական բյուջեի պակասուրդը միայն կապիտալ ծախսերի հաշվին ձևավորելու սկզբունքը: Տարվա համար նախատեսված բյուջեի պակասուրդը ՀՆԱ-ում կկազմի 2.6 տոկոս»,- ասաց Ջավադյանը՝ հավելելով, որ ստվերի կրճատման և հարկային վարչարարության բարելավման միջոցով շարունակվելու է հարկերի հավաքագրման բարձր տեմպերի ապահովումը:
Մանրամասները՝ տեսանյութում: