Հայկական կողմը պնդում է՝ ղարաբաղյան հիմնախնդրի կարգավորման ներկա փուլում կողմերը չեն բանակցում որևէ կոնկրետ փաստաթղթի շուրջ։ Մինչդեռ, Ադրբեջանի արտգործնախարար Մամեդյարովը պնդում է՝ կողմերը պայմանավորվածություն ունեն կոնկրետ բանակցությունների անցնելու մասին․ «Պատրա՞ստ է Հայաստանը, ըստ էության, բանակցելու, պարզ կլինի Բրատիսլավայում, քանզի փաստաթղթերն արդեն սեղանին են»։
Ի՞նչ եք կարծում՝ սա ադրբեջանական մանիպուլյացիա՞ է, թե՞ հայկական կողմը դեռ փորձում է լռություն պահպանել․ «Առաջին լրատվական»-ի հարցին քաղաքագետ Լևոն Շիրինյանը պատասխանեց․ «Անշուշտ, ադրբեջանական մանիպուլյացիա է և շփոթմունքի հետևանք, որովհետև իրենք սովոր էին մի ձևաչափի, որը կար վերջին քսան տարիներին։ Հիմա առաջացել է բոլորովին այլ իրավիճակ։ Հայաստանի վարչապետը Արևելյան Անդրկովկասի ամենաբարձր ու ստրատեգիական կետից հայտարարել է, որ «սա Հայաստան է, ու վերջ»։ Հիմա խնդիրը նրա քաղաքական պատկանելիության հարցի վերարծարծումն է, և հիմա այն մեր գիտության աշխատողների գործն է։ Այս պայմաններում Ադրբեջանը պետք է թուրքական «նեյնիմ» խաղա և սկսի խառնակչություն անել՝ շփոթ առաջացնի, մասնավորապես՝ հայկական կողմի ուղեղներում։ Բայց ես կարծում եմ, որ այն ազդեցություն չի ունենա՝ մենք ճիշտ ճանապարհի վրա ենք։ Եթե մեր քաղաքացին ուզում է իմ ասածի ճշմարտության մեջ համոզվի, ապա թող վերցնի ռուսական ռազմավարական գրականություն, որտեղ ասվում է, որ ցարական ժամանակներից ով տիրում է Շուշիին, նա տիրում է Արևելյան Անդրկովկասին։
Ինչ վերաբերում է Լավրովի հայտարարություններին, ապա ես պետք է ասեմ, որ հայկական կողմի փորձագետները պետք է սերտիֆիկատների կամ հավաստագրերի իմաստով ստուգվեն, թե ով են, ինչ կրթություն ունեն, կոնֆլիկտի տեսությունից ի՞նչ գիտեն, ստրատեգիան հասկանո՞ւմ են, թե չէ ամեն ինչ բնորոշում են որպես սենսացիա։ Լավրովի ասածների մեջ ոչ մի սենսացիա էլ, կարծում եմ՝ չկար։ Ուժերի բալանսը Արևելյան Անդրկովկասում փոխվել է, այն փոխվում է նաև Մերձավոր Արևելքում»։
Մանրամասները՝ տեսանյութում։
