Վաղը՝ ժամը 20:00-ին, Վազգեն Սարգսյանի անվան «Հանրապետական» մարզադաշտում ֆուտբոլի Հայաստանի ազգային հավաքականը նախավերջին հանդիպումը կանցկացնի 2020 թվականի Եվրոպայի առաջնության ընտրական փուլում՝ հյուրընկալելով Հունաստանին: Հանդիպում, որը մեր ազգային թիմը կանցկացնի առանց մի շարք առաջատար ֆուտբոլիստների: Վնասվածքի պատճառով հավաքականին չեն կարողանա օգնել Հենրիխ Մխիթարյանը, Կառլեն Մկրտչյանը, Սարգիս Ադամյանը, Գևորգ Ղազարյանը: Որակազրկման պատճառով Հունաստանի դեմ խաղին չի մասնակցի կենտրոնական պաշտպան Վարազդատ Հարոյանը, իսկ Մարկոս Պիզելին ավարտել է ելույթները ազգային թիմում:
Իրավիճակն այնպիսին է, որ առաջատար ֆուտբոլիստների բացակայությունը էապես կարող է ազդել թե խաղային որակի, և թե հանդիպման ելքի վրա: Ամեն դեպքում թեկուզ ոչ մարտական կազմով ակնկալում ենք, որ մեր հավաքականը կկարողանա վաստակել երեք միավոր: Հիշեցնենք, որ այս տարվա հունիսին մեր հավաքականը Աթենքում 3:2 հաշվով առավելության էր հասել նույն Հունաստանի նկատմամբ: Գլխավոր մարզիչ Աբրահամ Խաշմանյանի առաջ բավական բարդ խնդիր է դրված, բայց վստահաբար կարող ենք ասել, որ այն ամենևին էլ անլուծելի չէ: Փորձենք հասկանալ թե ինչ մատրավարությամբ և ինչ մեկնարկային կազմով Խաշմանյանը կպայքարի հույների դեմ: «Առաջին լրատվական»-ի վարկածով մեր հավաքականը կխաղա 4-2-3-1 մարտավարությամբ: Հաշվի առնելով կադրային լուրջ խնդիրները չենք կարծում, որ մերոնք ցուցադրեն ընդգծված հարձակվողական ֆուտբոլ: Կարծում ենք Հայաստանի ազգային հավաքականի դարպասը տևական դադարից հետո կպաշտպանի Գևորգ Կասպարովը: Արամ Հայրապետյանը վերջին երկու հանդիպումներում թույլ տվեց խայտառակ սխալներ և նրան կրկին հիմնական կազմում ընդգրկելը ճիշտ չի լինի: Պաշտպանության կենտրոնում կլինեն Անդեր Չալըշըրը և Հայկ Իշխանյանը: Հովհաննես Համբարձումյանը կգործի պաշտպանության աջ եզրում, իսկ ձախ եզրում կխաղա Կամո Հովհաննիսյանը: Հենակետային գոտում կլինեն Ռումյան Հովսեփյանն ու Արտակ Գրիգորյանը:
Վերջինս «Ալաշկերտի» հետ վերջին հանդիպման ժամանակ խաղավարտին փոխարինվել էր վնասվածքի պատճառով: Եթե Գրիգորյանը պատրաստ չլինի վաղը խաղադաշտ դուրս գալ, ապա նրա փոխարեն կխաղա Արտակ Եդիգարյանը: Կիսապաշտպանության ձախ եզրում տեսնում ենք Էդգար Բաբայանին, որը լավ մարզավիճակում է և իր թիմում աչքի է ընկնում արդյունավետությամբ: Աջ եզրում կգործի Տիգրան Բարսեղյանը: Ինչ վերաբերվում է ենթահարձակվողի գոտուն, ապա այս դիրքում տեսնում ենք վերջերս «Սոչի» տեղափոխված Էրիկ Վարդանյանին: Միակ նոմինալ հարձակվողը կլինի Ալեքսանդր Կարապետյանը: Խաշմանյանի տրամադրության տակ կան նաև այլ հարձակվողներ՝ Գեղամ Հարությունյան, Արթուր Սարկիսով: Բայց հաշվի առնելով Կարապետյանի արդյունավետությունն ու փորձը կարծում ենք մեկնարկային կազմում միակ հարձակվողը կլինի հենց նա: Հավանական է, որ վաղը խաղաժամանակ ստանա «Արարատ-Արմենիայի» կիսապաշտպան Պետրոս Ավետիսյանը: Վերջինս ևս հատկապես հաջող է գործում ենթահարձակվողի դիրքում: Հավաքական հրավիրված մյուս ֆուտբոլիստներից սպասելիքներն այնքան էլ մեծ չեն:
Գրեթե բոլոր խաղացողների ունակություններին ծանոթ ենք և հիմա հրաշքներ սպասելը այնքան էլ ճիշտ չի լինի: Կարևոր է, որ Մխիթարյանի և մյուս առաջատարների բացակայության պայմաններում գտնվեն ֆուտբոլիստներ, որոնք իրենց վրա վերցնելով խաղը առաջ կմղեն խաղընկերներին: Այս հարցում սպասելիքները մեծ են հատկապես Տիգրան Բարսեղյանից, Կամո Հովհաննիսյանից, Հովհաննես Համբարձումյանից և Ալեքսանդր Կարապետյանից: Այս ֆուտբոլիստներն ունեն մարտական բնավարություն և ստեղծված իրավիճակում պարտավոր են եղանակ ստեղծել խաղադաշտում: Իսկ ո՞վ կլինի ազգային հավաքականի ավագը: Մխիթարյանի բացակայության ժամանակ Լիխտենշտեյնի և Ֆինլանդիայի հետ հանդիպումներում ավագի պարտականությունները կատարեց Գևորգ Ղազարյանը: Այսօր հավաքականում չկա Ղազարյանը: Բացակայում է նաև Մարկոս Պիզելին, որը ևս կատարել էր ավագի պարտականություն: Որպես հավաքականի ավագի գլխավոր թեկնածուներ դիտարկվում են Կամո Հովհաննիսյանը և Հովհաննես Համբարձումյանը: Կարծում ենք սակայն նախապատվությունն այնուամենայնիվ կտրվի Հովհաննես Համբարձումյանին և հենց նա վաղը թիմին դուրս կբերի խաղադաշտ:
Չնայած, որ Հայաստանի հավաքականը Հունաստանին հաղթել է Աթենքում, այնուամենայնիվ վաղվա մրցավեճում բուքմեյքերական ընկերություններն ավելի հավանական են համարում հյուրերի հաղթանակի հնարավորությունը: Մասնավորապես, Հունաստանի հաղթանակի համար սահմանված է 2․15 գործակից: Ոչ-ոքին գնահատված է 3․6 իսկ Հայաստանի ազգային հավաքականի հաղթանակը՝ 3․5 գործակցով: Հայաստան-Հունաստան հանդիպումը կսկսվի ժամը 21:00-ին: Կուտակումներից խուսափելու համար ՀՖՖ-ն երկրպագուներին հորդորել է մարզադաշտ գնալ խաղից երկու ժամ առաջ:
