Ֆրանսիայի պաշտպանության նախարարության ղեկավար Ֆլորանս Փարլին բացատրել է երկրի նախագահ Էմանուել Մակրոնի արտահայտությունը Հյուսիսատլանտյան դաշինքի «ուղեղի մահվան» վերաբերյալ, հայտնում է «ՌԻԱ Նովոստին»:
Փարլիի խոսքերով, Ֆրանսիայի ղեկավարը նկատի է ունեցել, որ դաշնակից երկրները այլևս չեն կարող անտեսել ստեղծված ճգնաժամային իրավիճակը:
Չնայած այն հանգամանքին, որ ռազմական առումով ՆԱՏՕ-ն շարունակում է ուժեղ գործիք հանդիսանալ, կան մի շարք ներքին խնդիրներ, ներառյալ դաշնակիցների համերաշխության հարցը, ԱՄՆ-ի անվտանգության երաշխիքների վերաբերյալ կասկածները և եվրոպական անվտանգության հարցում դաշինքի անբավարար ջանքերը, հայտարարել է պաշտպանության նախարարը:
Նա նախագահ Մակրոնի արտահայտությունը տագնապի ազդանշան է անվանել Լոնդոնի գագաթնաժողովից առաջ և նշել, որ Ֆրանսիան առաջարկում է գործի դնել «դաշինքի ապագայի վերաբերյալ ռազմավարական մտածողությունը»:
Ավելի վաղ նախագահ Էմանուել Մակրոնը հայտարարել էր, որ ՆԱՏՕ-ն կորցրել է դաշնակիցների միջև համակարգումը, ինչը դարձել է դաշինքի «ուղեղի մահը»: