Հանրային խորհրդի նախագահ Վազգեն Մանուկյանն այսօր հայտարարել է Հանրային խորհրդից դուրս գալու մասին. նա նամակ է հղել հանրային խորհրդի անդամներին՝ հայտնելով, որ իր գործունեությունը ՀԽ-ում անիմաստ է համարում և դուրս է գալիս այդ կառույցից: Թեմայի շուրջ «Առաջին լրատվական»-ի հետ զրույցում քաղաքագետ, ՀԽ անդամ Ստեփան Սաֆարյանը նշեց, որ Վազգեն Մանուկյանի հրաժարականն սպասելի էր. «Դա պայմանավորված էր նրանով, որ Վազգեն Մանուկյանին (լինելով Հանրային խորհրդի նախագահ, ում վերանշանակել էր վարչապետը) ակնհայտորեն դուր չէր գալիս այն գործառույթների դաշտը, որն ապահովում են Հանրային խորհրդի մասին օրենքը, Հանրային խորհրդի կանոնադրությունը: Նոյեմբերի 7-ի նիստին նա բաց տեքստով շարադրեց իր պատկերացումները ՀԽ-ի մասին, ակնհայտ էր, որ այն, ինչ ներկայացրեց, գրված չէ օրենքում և կանոնադրության մեջ: Մինչ այդ նա բացահայտ չէր դարձնում իր քաղաքական շահագրգռություները:
Վազգեն Մանուկյանի ցանկությունը մեկն էր՝ Հանրային խորհուրդը դառնա քաղաքական հարթակ իր քաղաքական գործունեության համար: Վազգեն Մանուկյանն ասաց, որ իր առաքելությունը տեսնում է քաղաքական ընդդիմության դերում: Բայց Հանրային խորհուրդը այդ հարթակը չէ:
Հնարային խորհուրդը կառավարության խորհրդատուն է, ոչ թե ընդդիմախոսը: Օրենքը թույլ է տալիս, որ ամեն մի կառավարություն ձևավորի իր Հանրային խորհուրդը»:
Այսօր հրապարակվել է Վանո Սիրադեղյանի հայտնի նամակը Հոկտեմբերի 27-ից առաջ՝ ուղղված Վազգեն Սարգսյանին, և այնտեղ շատ է հիշատակվում նաև Վազգեն Մանուկյանի անունը: Ստեփան Սաֆարյանը, անդրադառնալով այս դիտարկմանը, նշեց, որ երբ նամակը հրապարակվեց 1999թ. հոկտեմբերի 27-ից հետո, կային կասկածներ՝ արդյոք ինքն է նամակի հեղինակը, որովհետև նա արդեն փախուստի մեջ էր: «Բայց ես գիտեի, որ այդ տողերը Վանո Սիրադեղյանի տողերն էին, քանի որ ես անձամբ էի այդ ամենը լսել նրանից Վահան Խորխոռունու հուղարկավորության օրը: Ես ավելի ալեկոծված երբևիցե չէի տեսել Վանո Սիրադեղյանին, ձեռքերը դողում էին, նա ասաց. «Վազգեն Սարգսյանին տեսա, ասացի՝ քո երկու ձեռքերը կտրված են, այժմ քո վիզը կտրելու ժամանակն է գալու, եթե չսթափվես… Եվ այս նամակում նույնպես չարագուշակ կանխատեսում կար արված Վ. Սարգսյանի ապագայի մասին, գրված է նույն ոճով… Եթե Վանո Սիրադեղյանի նամակում շոշափվում է Վազգեն Մանուկյանի անունը, և Նաիրի Հունանյանը նույնպես հնչեցրել է նրա անունը՝ մանրամասներ պատմելով, որ հանցագործությունից առաջ հանդիպել է նրա հետ, Վազգեն Մանուկյանը պարտավոր է շատ լուրջ բացատրություններ տալ հասարակությանը:
Մանրամասն՝ տեսանյութում:
