Լուրեր
Մեր պայքարը քաղաքական չէ. Արծրուն Ավագյանը՝ դասադուլի և ռուսաց լեզուն երկրորդ պետական լեզու հռչակելուն կողմ լինելու մասին
  • 09:45
  • 2019-11-14
  • Դիտումներ՝ *

Երևանի պետական համալսարանի  Հայ բանասիրության  և  պատմության ֆակուլտետների դասախոսները՝ նոյեմբերի 13-ին մեկօրյա գործադուլ էին հայտարարել՝ ընդդեմ Հայոց լեզու, Հայ գրականություն և Հայոց պատմություն առարկաները հայեցողական դարձնելու ԿԳՄՍ նախարարության հայտնի օրինագծի։ Այս կերպ այդ ֆակուլտետների դասախոսները փորձել են իրենց աջակցությունը հայտնել արդեն մեկ շաբաթից ավել դասադուլներ իրականացնող ուսանողներին։

ԵՊՀ Հայ բանասիրության ֆակուլտետի դեկան Արծրուն Ավագյանի խոսքերով՝ սա պրոֆեսորադասախոսական կազմի կողմից մեկօրյա նախազգուշացնող գործադուլ էր՝ որպես միաբանության քայլ։

«Այս ֆակուլտետների դասախոսական կազմը՝ դեկանների գլխավորությամբ խորհրդակցություն է անցկացրել, ընդունել ենք նաև հայտարարության տեքստ, որի  տակ ստորագրել  են  գործադուլ իրականացնող  դասախոսները։

Ես  բոլորովին նորմալ չեմ համարում, որ խաթարվում են դասապրոցեսները և ինքս էլ բազմիցս  հայտարարել եմ, որ դեմ եմ դասադուլներին, սակայն մյուս կողմից էլ գտնում եմ, որ ուսանողներն իրավունք ունեն իրենց կամքն արտահայտելու, բայց լավ կլիներ, որ այդ կամքն արտահայտեին դասերից դուրս»,- «Առաջին լրատվական»-ի հետ զրույցում նշեց Արծրուն Ավագյանը։

Վերջինիս  տեղեկացմամբ՝ իրենց ֆակուլտետի երեք դասախոս չի միացել գործադուլին  և  չեն  ստորագրել հայտարարության տեքստի ներքո։

Սրանից զատ, նշենք , որ գործադուլին չեն միացել նաև ԵՊՀ մշակութաբանության ֆակուլտետի  դասախոսները։ Այս  կապակցությամբ Արծրուն Ավագյանը հրաժարվեց  մեկնաբանություն տալ՝ ասելով, որ սա այդ դասախոսների անձնական որոշումն է և որևէ բան չեն կարող պարտադրել։

Դեկանի պնդմամբ՝ իրենց պայքարը  քաղաքական  բնույթ չի կրում և իրենք պարզապես դեմ են արտահայտվում այդ առարկաները ուսուցման պարտադիր ցանկից հանելուն։

«Մենք Արայիկ Հարությունյանի հրաժարականը չենք պահանջում, մեր պայքարը  ո´չ քաղաքական է, ո´չ էլ անձնավորված, իսկ ինչ վերաբերում է այդ ցույցերին ՀՅԴ ներկայացուցիչների մասնակցությանը, ապա ոչ մեկին չենք կարող արգելել»,-ընդգծեց Արծրուն  Ավագյանը։

 

Մանրամասները՝ տեսանյութում։

  • Դիտումներ՝ *