Ազգային ժողովում այսօր հարցուպատասխանի օր էր, մինչ այդ բավականին աշխույժ մթնոլորտում՝ քննարկվել է ԲՀԿ խմբակցության պատգամավոր Գևորգ Պետրոսյանի ներկայացրած նախագիծը. պատգամավորն առաջարկում է «Ընտանեկան օրենսդրության մասին» նախագծում փոփոխություն կատարել, որպեսզի արգելվի միասեռական և սեռափոխված անձանց երեխա որդեգրելը: Քննարկման ընթացքում խնդրի ակունքները հասել են ընդհուպ մինչև Պապ թագավորին:
«Առաջին լրատվական»-ի հետ թեմայի շուրջ քննարկմանը մասնակցեցին ԱԺ «Իմ քայլը» խմբակցության պատգամավոր Տիգրան Ուլիխանյանը, վերլուծաբաններ Կարպիս Փաշոյանը և Հակոբ Բադալյանը:
«Օրենսդրական նախաձեռնությունները պետք է անհրաժեշտությունից ելնելով լինեն, ոչ թե քանակ ապահովելու համար»,- նշեց Տ. Ուլիխանյանը: Նրա դիտարկմամբ՝ ԲՀԿ-ի գործողություններն ուղղված են իրենց քաղաքական բովանդակության բացակայությունն ինչ-որ բաներով լցնելուն:
Կարպիս Փաշոյանի խոսքով՝ Պապ թագավորի թեման նույնասեռականության համատեքստում քննարկելը դիլետանտություն է: Վերլուծաբանի դիտարկմամբ՝ ըստ էության, Գևորգ Պետրոսյանը անվճար զբաղվում է նույնասեռականության պրոպագանդայով. «Եթե տաբու թեմաների մասին շատ է խոսվում, դրանք մաշվելու, ականջին սովոր դառնալու հատկություն ունեն… Այդպիսի թեմաները անհատական նախաձեռնությամբ չեն քննարկվում, այլ կոնկրետ ուժերի որոշմամբ: Ընտրել են հատուկ թեմաներ և փորձում են քայքայիչ գաղափարախոսության միջոցով ամրապնդվել ընդդիմադիր դաշտում և աստիճանաբար հեղինակազրկել իշխանությանը»:
Հակոբ Բադալյանի դիտարկմամբ. «Գևորգ Պետրոսյանը ԲՀԿ Ժիրինովսկին է. մի ֆիգուր, որի անձնական մոտեցումների միջոցով արտահայտվում են մտքեր, որոնք խմբակցության մյուս անդամները չեն ասում, տեսանք, որ Ծառուկյանը սատարեց, բայց այդ մտքերն արտահայտելը վերապահված է Գ.Պետրոսյանին: Այս թեմաները շահարկելով՝ փորձ է արվում ինչ-որ միավորներ հավաքել ընդդիմադիր դաշտում: ԲՀԿ-ի համար լուրջ խնդիր է՝ գտնել սեփական տեղը նոր քաղաքական իրավիճակում… այդ կուսակցությունն անելանելի վիճակում է»:
Քննարկման մասնակիցներն անդրադարձան նաև Հանրային խորհրդի նախագահ Վազգեն Մանուկյանի հայտարարությանը Հանրային խորհրդից դուրս գալու մասին. նա նամակ է հղել հանրային խորհրդի անդամներին՝ հայտնելով, որ իր գործունեությունը ՀԽ-ում անիմաստ է համարում և դուրս է գալիս այդ կառույցից, ինչ մասին գրավոր տեղեկացրել է կառավարությանը:
Մանրամասն տեսանյութում:
