Ֆրանսիայում կալանավորվել է լեգենդար Cirque du Soleil կրկեսի հիմնադիր Գի Լալիբերտեն մարիխուանա աճեցնելու համար: Այդ մասին հայտնում է Le Figaro-ն՝ հղում անելով Պապետե քաղաքի դատախազությանը։
Կանադացի միլիոնատերը կանեփ է աճեցրել Թուամոտու արշիպելագի իր Նուկուտեպիպի կղզում: Թմրանյութը աճեցվել է հատուկ սարքավորված կողպված կոնտեյներում։
Ոստիկանությունը մինի պլանտացիայի մասին իմացել է միլիոնատիրոջ սերտ շրջապատի մարդկանցից մեկի ձերբակալությունից հետո: Ձերբակալվածի հեռախոսում եղել են հնդկական կանեփի լուսանկարներ։
Դրանից հետո Լալիբերտեն կալանավորվել է Պապետեի օդանավակայանում, իսկ չորեքշաբթի՝ նոյեմբերի 13-ին, նա ներկայանալու է դատարան:
Միլիոնատիրոջ Lune Rouge ընկերությունը հայտարարել է, որ մարիխուանան աճեցվում է «բուժական նպատակներով» և «բացառապես անձնական սպառման համար»: Ոստիկանները ստուգելու են այս հայտարարության իսկությունը և թե արդյոք ընկերությունն ունեցել թմրամիջոցների բաշխման ուղիներ: