Բրիտանացի հանրահայտ երգիչ Ռոդ Ստյուարտը զարմացրել է իր երկրպագուների բանակին` ներկայացնելով երկաթուղու մի մոդել, որի ստեղծման համար նրանից 26 տարի է պահանջվել: Սա 1940-ականների ցանկացած ամերիկյան քաղաքի արդյունաբերական մասի լանդշաֆտի ամենափոքր մանրուքների աներևակայելի ճշգրիտ վերարտադրություն է: Երկնաքերեր, կայարան, պահեստ, ռելսեր, լոկոմոտիվներ և գնացքներ, կամուրջներ, ավտոմեքենաներ, 70 տարի առաջվա նորաձևության մեջ հագնված մարդիկ․ այս ամենը ապշեցնում է ոչ միայն մանրակրկիտ ճշգրտությամբ, այլև իր չափերով: Մակետի երկարությունը 38 մետր է և լայնությունը 7 մետր։
Ստյուարտը ամեն ինչ արել է իր ձեռքերով: Նրան օգնել է միայն նրա կինը` 48-ամյա Փենի Լանկաստերը: Պատանեկության տարիներին նա հայտնի մոդել էր, այնուհետև սկսել է հետաքրքրվել լուսանկարչությամբ: «Երբ մենք քայլում էինք Փենիի հետ և տեսնում մի հետաքրքիր քաղաքապատկեր, ես խնդրում էի նրան լուսանկարել: Եվ հետո տանը, մենք նկարներից տարբեր դետալներ էինք դուրսբերում միասին: Բացի այդ, կինս ինձ հուշել է հաջող գունային սխեմա: Երբ նայում եք մակետին, թվում է, թե այն լուսավորված է արևի ճառագայթներով տաք կեսօրին»,- ասել է Ստյուարտը։