Նոյեմբերի 6-ից ԵՊՀ հայ բանասիրության և պատմության ֆակուլտետների ուսանողները դասադուլ են անում՝ բողոքելով «Բարձրագույն կրթության եւ գիտության մասին» ՀՀ օրենքի նախագծից, ըստ որի՝ «Հայոց լեզու», «Հայ գրականություն» և «Պատմություն» առարկաների դասավանդումը պարտադիր չի լինելու ոչ մասնագիտական ֆակուլտետներում: Ուսանողները պահանջում են ԿԳՄՍ նախարար Արայիկ Հարությունյանի հրաժարականը՝ նրա «ապազգային կողմնորոշմամբ պայմանավորված»:
Որքանո՞վ է ուսանողների նախաձեռնությունն ինքնաբուխ, ի՞նչ նպատակներ է հետապնդում և առհասարակ վերոնշյալ օրինագիծն ինչու այսպիսի դիմադրության արժանացավ: Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Դավիթ Հովհաննիսյանը և «Ռեստարտ» նախաձեռնության անդամ Դավիթ Պետրոսյանը:
Դավիթ Հովհաննիսյանի խոսքով՝ ցույցերը տեղի են ունենում ոչ միայն դաշնակցականների, այլ նաև ուսխորհուրդների մասնակցությամբ, որոնք մինչև հիմա շարունակում են մնալ հանրապետականներին կից կառույցներ: «Ազատություն է տրված, որպեսզի բուհերը որոշեն, թե ինչ խորությամբ պետք է անցնեն այդ առարկաները: Եվ հիմա կեղծ «ազգային» լոզունգներով դուրս են եկել՝ օգտագործելու առիթը՝ փորձելով իրականացնել իրենց խոստացած թեժ աշունը»,- նշեց վերլուծաբանը:
Դավիթ Պետրոսյանի դիտարկմամբ՝ մեկուկես տարվա ընթացքում հստակ քայլեր չեն իրականացվել կրթական համակարգն առողջացնելու և իրական բարեփոխումների նախապատրաստելու համար: Նրա կարծիքով՝ նախ պետք է գնահատական տրվեր անցյալին՝ ոչ միայն քաղաքական, այլ նաև կապված կրթության որակի հետ, նոր ռազմավարություն պետք է դրվեր կրթության համակարգում: «Դեկաններ կան, որոնք այն ժամանակ չէին թողնում դասադուլ անել, իսկ այժմ խթանում են, խրախուսում են. խնդիրը քաղաքական է, և «Հայոց լեզվի» ու «Հայոց պատմության» հետ կապված խնդիրը կտրուկ վերածում են նախարարի հրաժարականի,- նշեց Դավիթ Պետրոսյանը: -Այ՛ո, Հարությունյանի աշխատանքից մենք էլ գոհ չենք, բայց այս ակցիաներով ուսանողներին, ցավոք փորձում են օգտագործել»:
Մանրամասն տեսանյութում:
