Այսօր՝ նոյեմբերի 13-ին, Ազգային ժողովը շարունակում է աշխատանքը: ԱԺ-Կառավարություն հարցուպատասխանի ժամանակ պատգամավոր Արման Բաբաջանյանը, դիմելով վարչապետ Փաշինյանին, ասաց. «Օրերս դուք հանդիպել էիք Արցախի Ազգային ժողովի» «Ազատ հայրենիք» խմբակցության անդամներին, և իրենք հարցազրույցում նշել են, թե դուք ասել եք, որ Արցախի հարցի Մադրիդյան սկզբունքները այս պահին բանակցային սեղանին չեն»:
Խնդրելով հերքել կամ հաստատել այդ տեղեկությունը՝ պատգամավորը խնդրեց պարզաբանել. «Եթե չկա այդ փաստաթուղթը, ապա ի՞նչ կա. կա՞ արդյոք միջնորդների կողմից մտադրություն նոր փաստաթուղթ երևան բերելու»:
Անդրադառնալով ՌԴ ԱԳ նախարար Լավրովի հայտարարությանը՝ պատգամավորն ասաց. «Լավրովը Երևանում հայտարարել էր հայ-թուրքական գործընթացի մասին: Հնարավո՞ր է, որ ինչ-որ պահի Երևանին և Անկարային առաջարկ արվի սկսելու այդպիսի գործընթաց: Ունե՞ք նման առաջարկ ձեր սեղանին կամ պատկերացնո՞ւմ եք այդպիսի գործընթացի մեկնարկ Ռուսաստանի միջնորդությամբ»:
Հարցին այլաբանորեն պատասխանելով՝ Փաշինյանն ասաց. «Եթե փետրվարին ինչ-որ մեկն առաջարկի գնալ Սևանում լողանալու, այդ առաջարկն այնքան էլ տրամաբանական չի լինի, եթե հուլիսին առաջարկեն՝ դրա մեջ տրամաբանություն կլինի: Տարածաշրջանային իրավիճակը ցույց է տալիս, որ այդտեղ փետրվարն է և պետք չէ իրերը հավաքել և գնալ լողանալու, թե չէ թոքաբորբ կստանանք, ինչպես արդեն մեկ անգամ եղել է: Սևանում լողանալը լավ բան է, բայց պետք է նայել օրացույցին և թե դրսում ինչ աստիճան է»:
Մանրամասները՝ տեսանյութում:
