Երեկ հայտնի դարձավ, որ ֆուտբոլի Հայաստանի ազգային հավաքականի առաջատարներից Գևորգ Ղազարյանը ևս չի մասնակցի 2020 թվականի Եվրոպայի առաջնության ընտրական փուլի Հունաստանի և Իտալիայի դեմ հանդիպումներում: Մարզումների ժամանակ Ղազարյանը ցավեր է զգացել ծնկի հատվածում: Նախնական հետազոտությունը ցույց է տվել, որ մեր կիսապաշտպանի վնասվածքը լուրջ է: Այսպիսով առաջիկա հանդիպումներին վնասվածքի պատճառով չեն մասնակցի նաև Հենրիխ Մխիթարյանը, Կառլեն Մկրտչյանը և Սարգիս Ադամյանը: Մարկոս Պիզելին ավարտեց ելույթները Հայաստանի ազգային թիմում, իսկ Վարազդատ Հարոյանը Հունաստանի հետ մրցավեճը բաց կթողնի որակազրկման պատճառով: Աբրահամ Խաշմանյանի հայտացուցակում չէ նաև մեկ այլ առաջատար՝ Արաս Օզբիլիսը, Հարոյանը, Մկրտչյանը, Մխիթարյանը, Պիզելին, Ադամյանն ու Ղազարյանը: Այս ֆուտբոլիստները տարիներ շարունակ կազմել են մեր հավաքականի կորիզն, իսկ այսօր․․․:
Դժվար է հիշել վերջին անգամ երբ էր մեր հավաքականը միանգամից այսքան կորուստներ կրել, ուստի ստեղծված իրավիճակը կարելի է բացառիկ համարել: Կարելի է ասել, որ նոյեմբերի 15-ին Հունաստանի դեմ մեր ընտրանին կպայքարի ըստ էության երկրորդ կազմով: Ցավալին այն է, որ Հայաստանի ազգային թիմն ըստ էության չունի ռեզերվ: Երբ առաջատար ֆուտբոլիստները շարքից դուրս են լինում խոսվում է երիտասարդ ֆուտբոլիստների դրսևորվելու հնարավորության մասին: Իսկ ովքեր են մեր երիտասարդ կադրերը, որոնք ազգային հավաքականում են: Կարելի է առանձնացնել թերևս Էրիկ Վարդանյանին, որն ամենայն հավանականությամբ հնարավորություն կունենա առաջիկա հանդիպումներում դրսևորվելու: Վանդանյանից բացի պարզապես չունենք երիտասարդ անհատականություն, որի հետ կարելի կլինի հույսեր կապել: Բացառության «Արարատ-Արմենիայի» պաշտպան Արթուր Դանիելյանի՝ այս հրավիրված բոլոր ֆուտբոլիստները հասցրել են խաղալ Հայաստանի հավաքականում: Հետևաբար, Հունաստանի և Իտալիայի հետ հանդիպումները հնարավորություն են այն ֆուտբոլիստների համար, որոնք նախկինում հնարավորություն չեն ունեցել խաղալու հիմնական կազմում: Որոշակի սպասելիքներ ունենք դանիական «Հոբրո» ակումբում ելույթ ունեցող Էդգար Բաբայանից: Կարծում ենք այս ֆուտբոլիստը կիսապաշտպանության աջ եզրում Գևորգ Ղազարյանի ամենահավանական փոխարինողն է:
Թերևս մեկ անգամ է Բաբայանը տեղ գտել ազգային թիմի մեկնարկային կազմում և վատ տպավորություն չի թողել: Խոսքը այս տարվա մարտին Երևանում տեղի ունեցած Ֆինլանդիայի դեմ հանդիպման մասին է: Ղազարյանի Մխիթարյանի և Մարկոսի բացակայության պայմաններում ենթահարձակվողի դիրքում ավենաիրական թեկնածուն էլ Էրիկ Վարդանյանն է: Ոմանք այս դիրքում տեսնում են Պետրոս Ավետիսյանին, բայց վստահաբար կարող ենք ասել, որ Վարդանյանը որակապես գերազանցում է Ավետիսյանին և կարծում ենք ավելի շատ օգուտ կբերի ազգային հավաքականին: Տևական դադարից հետո ազգային հավաքականում է նաև կիսապաշտպան Արտյոմ Սիմոնյանը: Վերջինս ամռանը «Արարատից» տեղափոխվելով «Փյունիկ» խաղի որակի կտրուկ աճ գրանցեց և հատկապես հաջող ելույթ ունեցավ Եվրոպա լիգայի խաղարկությունում: Վերջին ամիսներին սակայն Սիմոնյանի խաղը «Փյունիկում» այն չէ: Վերջին 3 հանդիպումներում այս ֆուտբոլիստը տեղ չի գտել իր թիմի մեկնարկային կազմում: Խոստովանենք, որ Սիմոնյանի ազգային թիմում լինելն այնքան էլ տրամաբանական չէ: Ամեն դեպքում Խաշմանյանի հավաքականի գլխավոր մարզիչ նշանակվելուց հետո սպասելի էր, որ Սիմոնյանի առաջ հնարավորություն կբացվի մեր գլխավոր թիմում:
Խաշմանյանը վստահում է այս ֆուտբոլիստին: Խաշմանյանի օրոք Սիմոնյանը խաղացել է «Ալաշկերտում», իսկ այն բանից հետո, երբ մասնագետը այս տարի գլխավորեց Երևանի «Արարատը», Սիմոնյանն անմիջապես հայտնվեց նույն թիմում: Չնայած որ Սիմոնյանը աչքի չի ընկնում կայուն խաղով այնուամենայնիվ նրա որակները վատը չեն և հուսանք, որ Խաշմանյանը կստիպի նրան օգտակար լինել ազգային հավաքականի համար: Ինչ վերաբերվում է հավաքական հրավիրված հարձակվողներին, չայած, որ Ալեքսանդր Կարապետյանը հազվադեպ է հայտնվում «Սոչիի» մեկնարկային կազմում, այնուամենայնիվ նրա ներկայությունը հիմնական կազմում կարծես այլընտրանք չունի: Ընթացիկ շրջափուլում Կարապետյանն աչքի է ընկել արդյունավետությամբ և հանդիսանում է մեր առջևի գծի առաջատարը: Ինչ վերաբերվում է Գեղամ Հարությունյանին, ապա նա կարող է դիտարկվել որպես կենտրոնական հարձակվողի փոխարինող: Նույնը կարելի է ասել նաև Աթրուր Սարկիսովի մասին: Կիսապաշտպանության աջ եզրում վերջին շրջանում տպավորիչ ելույթներով աչքի է ընկել Տիգրան Բարսեղյանը:
Մյուս առանցքային ֆուտբոլիստների բացակայության պայմաններում առջևի գծում սպասելիքները մեծ են հենց Բարսեղյանից և Կարապետյանից: Հունաստանի դեմ Հայաստանի հավաքականի հավանական մեկնարկային կազմին կանդրադառնանք վաղը:
