Գևորգ Պետրոսյանը շատ հարգալից ներկայացրել է կուսակցության տեսակետը։ Կարող եք 7 անգամ միացնել ու նայել, որևիցե վիրավորական բան չկա։ Այս մասին լրագրողների հետ զրույցում ասաց ԲՀԿ առաջնորդ Գագիկ Ծառուկյանը՝ անդրադառնալով Գևորգ Պետրոսյանի առաջարկին՝ Հայաստանում օրենքով արգելել նույնասեռականների և սեռափոխվածների միասեռ ամուսնությունները և նրանց երեխա որդեգրելու իրավունքը։
Գագիկ Ծառուկյանը կիսում է ԲՀ խմբակցության քարտուղար Արման Աբովյանի հայտարարությունն այն մասին, որ հալալ է Գևորգ Պետրոսյանին այս հարցն օրակարգ բերելու համար։
«Այո հալալ է, Պետրոսյան Գևորգի ցավը տանեմ։ Առաջին քրիստոնյա ազգն ենք, մեր համար անընդունելի է, որ կարող են համասեռամոլները երեխա որդեգրեն ու այդ երեխային դաստիարակեն։ Ո՞վ կարող է պատկերացնել, թե այդ երեխան ինչ կարող է անել։ Մենք ավանդական ազգ ենք։ ԲՀԿ-ի համար, սկսած Գագիկ Ծառուկյանից, դա անընդունելի է։ Թող ասեն, որ հետամնաց ենք»,-նշեց Գագիկ Ծառուկյանը։