Տեխասի Friends For Life կենդանիների կացարանը Քվիլթի անունով կատվին «մեկուսարան» է ուղարկել այն բանի համար, որ ամեն անգամ նրա օգնությամբ ազատության մեջ էին հայտնվում այլ կատուներ, գրել է «Սնոբը»:
Կացարանի ներկայացուցչի խոսքերով, Քվիլթին անընդմեջ մի քանի «գիշերային ակցիաներ» է անցկացրել: Կենտրոնի աշխատակազմը առավոտյան գալիս էր աշխատանքի և տեսնում կացարանի գրասենյակային հատվածում ազատ շրջող բազմաթիվ կատուների, որոնք «քաոս» էին ստեղծում տարածքում: Սովորաբար կենդանիներին փակում էին ընդհանուր սենյակում, բայց հսկիչ տեսախցիկները ցույց են տվել, որ Քվիլթին բացում է դուռը:
Աշխատակիցների խոսքերով, նրանք փորձել են ինչ-որ կերպ կանխել Քվիլթիի ակցիաները, բայց չեն կարողացել կանգնեցնել կատվին: Կենտրոնը հատուկ փականք է գնել, բայց տեղադրումից առաջ այն «խորհրդավոր կերպով անհետացել է»: Երկրորդ փականքի ձեռքբերումից առաջ Քվիլթիին ուղարկել են «մեկուսարան», բայց նա չի հրաժարվել այդտեղից դուրս գալու փորձերից: