Այսօր վերսկսվել է Ռոբերտ Քոչարյանի և մյուս նախկին բարձրաստիճան պաշտոնյաների գործով դատավարությունը: Ինչպես գիտեք՝ նոյեմբերի 7-ին դատավոր Աննա Դանիբեկյանը մերժեց Քոչարյանին գրավով ազատ արձակելու մասին պաշտպանների միջնորդությունը և հայտարարեց դատական նիստը հետաձգելու մասին:
Այս օրերին տեղի են ունեցել մի քանի ուշագրավ իրադարձություններ, որոնք ուղղակի կամ անուղղակի ազդեցություն են ենթադրում դատական այս գործընթացի վրա, մասնավորապես Ռ. Քոչարյանը հանդես եկավ հոդվածով, Երևան այցելեց ՌԴ արտգործախարար Լավրովը և բավական ուշագրավ հայտարարություններ արեց, որոնք շարունակում են մնալ վերլուծական շրջանակների ուշադրության կենտրոնում:
Թեմայի շուրջ «Առաջին լրատվական»-ի հետ քննարկմանը մասնակցեցին «Ժառանգություն» կուսակցության փոխնախագահ Նարինե Դիլբարյանը, «Մոդուս Վիվենդի» վերլուծական կենտրոնի տնօրեն Արա Պապյանը և «Անտարես» հրատարակչության տնօրեն Արմեն Մարտիրոսյանը:
Անդրադառնալով հարցին, թե արդյոք քաղաքական կապ կա Ռ. Քոչարյանի դատավարության և վերջին օրերի քաղաքական իրադարձությունների միջև, Նարինե Դիլբարյանը նշեց. «Կարծում եմ ուղղակի կապ կա, և հետաքրքիր զարգացումներ կարող են լինել Լավրովի հայտարարությունից հետո: Մատնանշվեց այն իրական փաստը, որ հենց Հայաստանի ջանքերով է Արցախը բանակցային պրոցեսից դուրս մղվել, և դա առավել որոշակի դարձավ Ռոբերտ Քոչարյանի պաշտոնավարման ժամանակ: Այն ժամանակ բուռն հակադրություն չառաջացավ: Չմոռանանք Լավրովի նաև այն հայտարարությունը, որ առանց Արցախի համաձայնության այդ հարցը լուծվել չի կարող, որովհետև Հայաստանը պարզապես չի ստորագրի»:
«Լավրովի հայտարարությունը բառերով շատ մոտ է Հայաստանի նոր իշխանության հայտարարությանը, բայց, կարծում եմ, պատկերացումները տարբեր են,- նշեց Արա Պապյանը:- Արցախը երբեք չի մասնակցել բանակցություններին այնպես, ինչպես մենք ենք պատկերացրել»:
Արմեն Մարտիրոսյանի դիտարկմամբ՝ թե՛ ՀՀ այսօրվա իշխանությունը, թե՛ Լավրովը, ընդամենն ասում են, որ «ձյունը սպիտակ է»՝ հասկացել են, որ առանց Արցախի ժողովրդի այս հարցը չի լուծվի, այսինքն՝ նորություն չեն ասել, պարզապես արձանագրել են փաստ:
Անդրադառնալով դիտարկմանը, որ օրեր առաջ նախկին նախագահ Ռ. Քոչարյանը հոդված էր տպագրել, որտեղ խոսվում է ՀՀ նոր իշխանությունների հակառուսական և ընդգծված արևմտամետ գործողությունների մասին, իսկ Լավրովն իր հայտարարությամբ Հայասատնի նախկին իշխանություններին անհարմար դրության մեջ է դրել, Նարինե Դիլբարյանն ընդգծեց, որ Քոչարյանը սկսել է ապրել առասպելական իրականության մեջ. «Այն իրականության մեջ, որը հորինովի է, այնպիսին, ինչպիսին ինքն է ուզում տեսնել… Լավրովի այս հայտարարությունը վկայում է այն մասին, որ Ռուսաստանը Ռ. Քոչարյանի պատկերացումներով չէ, որ պետք է դիրքորոշում ցուցաբերի Հայաստանի վերաբերյալ»:
Քննարկման մասնակիցների կարծիքով՝ Քոչարյանը «դրսից տղա բերելու» տակտիկա է կիրառում: Իսկ Լավրովն իր հայտարարությամբ ակնարկեց՝ Քոչարյանը մարած քարտ է, վարվե՛ք՝ ինչպես կուզեք:
Մանրամասն տեսանյութում: