Դատական համակարգի քննարկումներն այսօր սուր կիզակետում են։ Թեմաների շուրջ զրույցի համար «Առաջին լրատվական»-ը հյուրընկալել է Բարձրագույն դատական խորհրդի անդամ Գրիգոր Բեքմեզյանին։
Անկա՞խ է այսօր դատական համակարգը․ «Առաջին լրատվական»-ի հարցին ԲԴԽ անդամ Գրիգոր Բեքմեզյանը պատասխանեց․ «Դատական համակարգի անկախությունը մենք պետք է բաժանենք մի քանի բաղադրիչների։ Նախ և առաջ, ո՞ւմից է անկախ՝ պետությունից, հասարակությունից, հասարակական կարծիքներից, օրենքից։ Պետք է նշեմ՝ ներկա պահին, գրեթե վստահությամբ ասում եմ, որ պետությունից դատական համակարգն անկախ է։ Այսինքն՝ պետության կողմից ճնշում դատական համակարգի վրա չի նկատվում։ Նկատի ունեմ այն ճնշումը, որն ունեինք նախկինում։ Ճնշում հասարակության կողմից, իհարկե, կա, կախվածություն հասարակական կարծիքից, ակնհայտ է, որ կա՝ դատավորներ կան, որոնք կարևորում են հասարակության կարծիքը, ինչը մի կողմից հասկանալի է՝ մարդկային առումով, բայց զուտ դատական տեսանկյունից ընդունելի չէ։ Այսինքն՝ դատավորը միշտ պետք է ճնշում զգա իր խղճի առջև, և նա պետք է ճնշված լինի օրենքից ու օրենքի ուժով գործի։
Ճնշում տարբեր դատավարությունների մասնակիցների կողմից, կողմերի կողմից, իհարկե, մենք տեսնում ենք, որ կա։ Այսինքն՝ փորձեր են կատարվում տարբեր կերպով ներազդել դատավորների վրա։ Շատ հաճախ այն լինում է հանրային ձևով, մամուլի միջոցով, սոցիալական ցանցերով։ Իրականում այդ ճնշումը կա և այն նկատելի է։ Շատերը կարող են պնդել, որ ճնշում կա նաև պետության կողմից, քանի որ պետությունը որոշակի հարցերով փորձում է ցույց տալ, թե ինքն ինչ լուծումներ է ուզում, կամ որոշումներ է ուզում։ Բայց, ամեն դեպքում, նշեմ, որ ճնշում ասելով՝ ես հասկանում եմ մի այնպիսի վիճակ, երբ դատավորն այդ ճնշման արդյունքում կայացնում է դատական ակտ, որը չի բխում օրենքի պահանջից։ Այսինքն՝ ճնշում միշտ լինելու է, բայց դատավորը պետք է լինի այնքան անկախ, որ չենթարկվի որևէ ճնշման, և ցանկացած դատական ակտ կայացնելիս վստահ լինի, որ ինքը գործում է իր խղճի հիման վրա և օրենքի հիման վրա»։
Մանրամասները՝ տեսանյութում։