ԱՄՆ Այովա նահանգում ցմահ դատապարտյալ Բենջամին Շրայբերը փորձում է հասնել ազատ արձակման, քանի որ նա կլինիկական մահ է տարել: Այս մասին գրում է The New York Times-ը:
Շրայբերը պնդում է, որ արդեն լրացրել է ժամկետը և կատարել է պետության առջև իր պարտավորությունները: Դատապարտյալին վերակենդանացրել են հակառակ իր կամքի. դեռևս բանտում նա ստորագրել է վերակենդանացումից հրաժարվելու տակ: Սակայն բժիշկները անտեսել են հանցագործի կյանքը չփրկելու խնդրանքը:
Տղամարդուն մերժել են ազատ արձակել երկու ատյանների դատավորները: Դատավոր Ամանդա Փոթերֆիլդի խոսքով՝ Շրայբերը կա՛մ ողջ է, և այդ դեպքում պետք է գտնվի բանտում, կա՛մ մեռած. այդ դեպքում նրա բողոքարկումը «վիճահարույց է: Նա նաև հայտարարել է, որ «ապրել» հասկացությունը չի սահմանվում նահանգի օրենսգրքով, ուստի տղամարդը պետք է իր կյանքի մնացած օրերը անցկացնի բանտում՝ անկախ այն բանից, թե նա արդյոք հարությո՞ւն է առել:
66-ամյա Բենջամին Շրայբերին դատապարտել են ցմահ ազատազրկման սպանության համար՝ առանց վաղաժամկետ ազատ արձակման իրավունքի: 1996թ. նա մահացու կերպով հարվածել է մարդուն կացնի կոթով:
2015 թվականին նրան հոսպիտալացրել են կծկումներով և բարձր ջերմությամբ: Բժիշկները դատապարտյալի երիկամներում գտել են խոշոր քարեր, որոնք առաջացրել են ընդհանուր վարակ: Երբ Շրայբերը կորցրել է գիտակցությունը, բուժաշխատողներից մեկը զանգահարել է նրա եղբորը, որն ասել է, թե տղամարդուն կարելի է տալ ցավազրկող, սակայն նրան պետք է «բաց թողնել»: Չնայած դրան՝ ազատազրկվածին փրկել են:
