Հարավարևելյան Ուկրաինայի մարզերում իրավիճակը լարված է՝ գրոհային խմբերը, ինչպես շաբաթներ առաջ Ղրիմում, փորձում են գրավել պետական շենքերը՝ դրանց վրա ամրացնելով ռուսական դրոշներ: Երկրի ՆԳ նախարարի պաշտոնակատար Արսեն Ավակովն օրերս հարկադրված գործողություններ սկսեց Սլավյանսկ քաղաքը գրոհայիններից ազատելու նպատակով:
Բախումներից զերծ չեն մնում նաև հայ համայնքի ներկայացուցիչները, որոնցից մեկը՝ Ռուբեն Ավանեսյանը, երեկ սպանվել է Սլավյանսկում: Ուկրաինայի հարավարևելյան բոլոր քաղաքներում կյանքը կաթվածահար է, հայ համայնքի ներկայացուցիչները ևս չեն կարողանում իրենց բնականոն կյանքով ապրել, աշխատանքի գնալ:
«Առաջին լրատվական»-ի հետ զրույցում Ուկրաինայի Լուգանսկ և Դոնեցկ մարզերի հոգևոր հովիվ Տ. Հուսիկ քահանա Նուրիջանյանը տեղեկացրեց, որ դեռ կարողանում են հայ համայնքի միասնական չեզոքությունը պահպանել: Ըստ նրա՝ և եկեղեցու ներկայացուցիչներին, և համայնքային բոլոր ղեկավարներին խնդրել են հնարավորինս չեզոքություն պահպանել, որևէ գործընթացի չմիջամտել, որովհետև հայերն Ուկրաինայում հյուր են, և որևէ սխալ, չմտածված քայլ կարող է շրջվել իրենց իսկ դեմ:
Հարցին, թե, այնուամենայնիվ, ինչի՞ կողմնակիցն են հայերը, նա պատասխանեց՝ նրանք, ովքեր կապեր ունեն Կիևի հետ, ուզում են կիևյան կողմի հաղթանակը, իսկ մյուսները, տեսնելով Ռուսաստանն ու Ղրիմը, մտածում են, թե պետք է Ռուսաստանին միանալ:
«Վերջնական միասնական որոշում կայացրած հայություն չունենք, որ ասենք՝ լուրջ հակում ունի որևէ կողմը: Փորձում ենք, որքան հնարավոր է, չեզոքություն պահպանել: Մենք հյուր ենք այստեղ: Թե՛ Ռուսաստանի կազմում, թե՛ Ուկրաինայում հայերն զբաղվելու են իրենց այն գործով, ինչով զբաղվել են մինչ այսօր»,- ասաց նա:
