Լոռու մարզի ընդհանուր իրավասության դատարանում Սուրեն Բաղդասարյանի նախագահությամբ ավարտվել է Սարիկ Ու.-ի գործի դատական քննությունը:
30-ամյա Սարիկին մեղադրանք էր առաջադրվել տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Տուժողը Սարիկի մայրն է:
Ըստ մեղադրանքի՝ 2019 թվականի հունիսի 12-ին, ժամը 20-ի սահմաններում Ալավերդի քաղաքի իրենց բնակարանում Սարիկն իր 70-ամյա մորից 30 հազար դրամ է պահանջել: Մայրը մերժել է, ասել է, թե փող չունի:
Սարիկը, ըստ մեղադրանքի, վիճաբանել է մոր հետ, ապա հրել, հատակին է գցել մորը, ոտքերով հարվածել է նրա ձախ ազդրային շրջանին՝ պատճառելով առողջության ծանր վնաս՝ ձախ ազդրոսկրի փակ, միջտամբիոնային կոտրվածք:
Սարիկ Ու.-ի խափանման միջոցը կալանավորումն է:
Դատարանում Սարիկ Ու.-ն իրեն լիովին մեղավոր է ճանաչել, զղջացել է:
Մայրը նշել է, թե հաշտվել է որդու հետ, նրանից բողոք, պահանջ չունի:
Դատարանը հաշվի է առել, որ Սարիկ Ու.-ն նախկինում մի քանի անգամ դատապարտվել է: Արձանագրվել է հանցագործությունների կատարման վտանգավոր ռեցիդիվ Սարիկ Ու.-ի կողմից:
Դատարանը հաշվի է առել, որ Սարիկ Ու.-ն վատառողջ է, 2-րդ խմբի հաշմանդամ:
Դատարանն արձանագրել է, որ պայմանական դատապարտության կիրառումը Սարիկ Ու.-ի նկատմամբ չի հանգեցնի պատժի նպատակների իրագործմանը:
Սարիկ Ու.-ն, ըստ դատարանի եզրահանգման, կատարած արարքի համար պետք է կրի իրական ազատազրկման ձևով պատիժ:
Դատարանը Սարիկ Ու.-ին մեղավոր է ճանաչել ՀՀ քրեական օրենսգրքի 112 հոդվածի 1-ին մասով և դատապարտել է 3 տարի 6 ամիս ազատազրկման:
Պատժի կրման սկիզբը՝ 2019 թվականի հուլիսի 8-ից: