Մալայզիայում շարունակվում է սկանդալը, որն առաջացել է այդ երկրի նախկին թագավոր սուլթան Քելանթան Մուհամադ V-ի և ռուսաստանցի մոդել և «Միսս Մոսկվա 2015» գեղեցկության մրցույթի հաղթող Օքսանա Վոեվոդինայի ամուսնության պատճառով: Ինչպես հայտնի է դարձել բրիտանական «Daily Mail» պարբերականին, նախկին թագավորը, որը հրաժարվում է ճանաչել 27-ամյա մոդելի երեխային, պատճառաբանելով, որ տղայի՝ Լեոնի հայրը կարող է լինել «ասիական արտաքին ունեցող ցանկացած տղամարդ», նախկին կնոջը գումար է առաջարկել: Նա համաձայն է հավատարմագրային հիմնադրամ հիմնել հօգուտ Լեոնի՝ քառորդ միլիոն դոլարի չափով: Պայմանով, որ հետագայում ոչ Օքսանան, ոչ Լեոնը չեն փորձի կապ հաստատել նրա հետ: Եվս մեկ պայման է, որ տղան դաստիարակվի մուսուլմանական հավատքով: Օքսանան ևս պետք է փակի իր հաշիվները սոցիալական ցանցերում, որտեղ նա տեղադրել է սուլթանի լուսանկարները: Հավատարմագրային հիմնադրամից բացի, 50-ամյա սուլթանը պատրաստ է 10 ամսվա ընթացքում ևս 100 հազար դոլար վճարել նախկին կնոջը:
Վոեվոդինան, որին այս պայմանները չեն բավարարում, պնդում է, որ Լեոնը Մուհամադի օրինական որդին և ժառանգն է: Նա մտադիր է դատարան դիմել ԴՆԹ-ի վերլուծության պահանջով:
Նախկին «Միսս Մոսկվան», ըստ պարբերականի, ավելի վաղ պահանջել էր ամսական ավելի քան 31 հազար դոլար ալիմենտ, ինչպես նաև 20 միլիոն դոլար և թանկարժեք անշարժ գույք աշխարհի տարբեր քաղաքներում:
Մուհամադն ու Օքսանան ամուսնացել են անցած տարի, երբ Մուհամադը Մալայզիայի թագավորն էր: Հարսանիքից մի քանի ամիս անց, այս տարվա հունվարին, նա անսպասելիորեն հրաժարվել է գահից: Լեոնը ծնվել է 2019-ի մայիսի 21-ին: 2019-ի հունիսին նրանք ամուսնալուծվել են:
