Ֆրանսիայի նախագահ Էմանուել Մակրոնը հայտարարել է, որ ՆԱՏՕ-ն «ուղեղի մահ» է վերապրում: Այդ մասին հայտնում է The Economist-ը:
«Այն, ինչ մենք հիմա զգում ենք, դա ՆԱՏՕ-ի ուղեղի մահն է»,- ասել է Ֆրանսիայի առաջնորդը՝ մեկնաբանելով Թուրքիայի և Միացյալ Նահանգների հարաբերությունները: Նրա կարծիքով՝ Ամերիկան գնալով ավելի է հեռանում Եվրոպայից:
Մակրոնը ասում է, որ ժամանակն է, որ Եվրոպան արթնանա և սկսի կառուցել իր ուժերը, քանի որ այժմ «անդունդի եզրին է»: Հակառակ դեպքում Եվրոպան չի վերահսկի իր սեփական ճակատագիրը՝ նշել է նա:
Մակրոնի հայտարարությունը եվրոպական միասնական բանակ ստեղծելու ցանկության մասին արվել է մեկ տարի առաջ: Ֆրանսիայի նախագահի խոսքով՝ եվրոպացիներին անհրաժեշտ է պաշտպանություն Չինաստանից և Ռուսաստանից, որոնք «գտնվում են հենց սահմաններում և ցույց են տվել, որ կարող են սպառնալիք լինել»: Ֆրանսիայի նախագահը նաև ասել է, որ չի ցանկանում, որ ԵՄ երկրների պաշտպանությունը կախված լինի Միացյալ Նահանգներից:
