Պուտինի Օմսկ ժամանելու առիթով խոտածածկը ներկել են կանաչ գույնով, բայց ամեն ինչ փչացրել է «չնախատեսված» ձյունը

Ռուսական Օմսկում պաշտոնյաները չափն անցել են Վլադիմիր Պուտինի քաղաք ժամանելու հետ կապված նախապատրաստական աշխատանքներում: Սպասելով Ռուսաստանի Դաշնության նախագահի ժամանմանը, քաղաքային իշխանությունները շինությունների անհրապույր ճակատային պատերը ծածկել են վառ պաստառներով: Նույն կեղծ պաստառներով են քողարկվել նաև երկար տարիների կիսաավարտ կառույցները:

Վերջին պահին պաշտոնյաներից մեկի մոտ խոտը կանաչ գույնով ներկելու միտք է ծագել, որպեսզի քաղաքն ավելի «փթթուն» տեսք ունենա:

Սակայն ամեն ինչ փչացրել է անսպասելի տեղացած առատ ձյունը. այժմ «կանաչ» տարածքը փայլում է պայծառ փիրուզագույն երանգով:

Սոցցանցերում առաջարկել են հանրային ծառայություններին նորից ներկել ձյունը, քանի որ քաղաքի մեջտեղում առաջացած «կապույտ ծովը» հրեշավոր տեսք ունի: