Լուրեր
Հայաստանի տնտեսական զարգացման արգելակումը․ ինչո՞ւ է ավելացել վարկերի քանակն ու ինչպե՞ս են քաղաքացիները դրանք մարելու
  • 10:00
  • 2019-11-07
  • Դիտումներ՝ *

Համաձայն  ՀՀ Կենտրոնական բանկի  տվյալների՝  Հայաստանում տրամադրված սպառողական, հիփոթեքային և այլ տեսակի վարկերն աճել են, բայց  միևնույն ժամանակ  վարկավորման տոկոսադրույքները Հայաստանում համադրելի երկրների համեմատ ցածր են:

Օրերս հրավիրված  ասուլիսում Կենտրոնական բանկի  ֆինանսական համակարգի կայունության զարգացման վարչության պետ Անդրանիկ Գրիգորյանը հայտարարեց, որ սրան զուգահեռ Կենտրոնական բանկը հետևողականորեն ուշադրություն է դարձնում, թե հասարակությունում որքան է պարտքի բեռի կուտակումը՝ անհրաժեշտության դեպքում համապատասխան գործիքակազմ կիրառելու համար:

Թեմայի վերաբերյալ «Առաջին լրատվական»-ը  զրուցեց տնտեսագետ Աշոտ Մարկոսյանի հետ։

«Մի բան ակնհայտ է, երբ երկրի տնտեսությունը մտնում է որոշակի ակտիվության փուլ, իսկ իմ կարծիքով՝ մեր տնտեսությունը հիմա հենց այդ փուլում է, ապա պետք է կարողանանք տնտեսությանն ապահովել  դրամական միջոցներով։ Էժան փողի քաղաքականությունը կամ դրամավարկային քաղաքականությունը, ըստ էության, տնտեսության զարգացման հիմնական գործիքներից մեկն է և սա պետք է ողջունել, սակայն Հայաստանի դրամավարկային քաղաքականության հիմնախնդիրը մեկ այլ տեղում է, մասնավորապես՝  սպառողական, հիփոթեքային կամ այլ տեսակի վարկերի ավելացումը շատ ավելի արագ տեմպերով է տեղի ունենում, քան այդ ռեսուրսների ներդրումը տնտեսության մեջ։ Սա  նշանակում է, որ արտադրողական վարկերի ծավալը նույն չափերով ու տեմպով չի ավելանում,  մինչդեռ տնտեսության զարգացման հիմնական միջոցը արտադրական վարկերն են»,- նշեց  տնտեսագետը։

Վերջինս  այս համատեքստում  մի ուշագրավ հարց բարձրացրեց․

«Հայաստանի տնտեսության զարգացումն  ավելի շատ ինչն է արգելակում՝ զարգացման ծրագրերի  բացակայությո՞ւնը, թե՞ թանկ փողը․ հենց սրա շուրջ պետք է լուրջ մտածել, քանզի սա է տնտեսական այն խնդիրներից մեկը,  որն  առաջիկայում էլ  տարիներ շարունակ կանգնած է մնալու մեր տնտեսության առաջ»։

Հարցին՝ սոցիալական տեսանկյունից խնդիրը դիտարկելիս՝ արդյո՞ք նորմալ է  այդքան շատ վարկային միջոցների տրամադրումը, արդյո՞ք բանկերն ունեն ռիսկերի կառավարման քաղաքականություն և սոցիալական առկա պայմաններում քաղաքացի-վարկառուներն  ինչպե՞ս  են կարողանալու այդ վարկային պարտավորությունները կատարել,  Աշոտ Մարկոսյանը  պատասխանեց․

«Դա հստակ բացատրություն ունի, որովհետև բանկային համակարգում գոյություն ունի  ժամկետնանց վարկեր հասկացությունը, որը, սակայն,  ներկա դրությամբ գտնվում է դեռ  իր նորմայի մեջ։

Մենք ունեցել ենք որոշակի ժամանակահատված՝ օրինակ 2015 թվականը, երբ  տրամադրվող վարկերը բավականին բարձր էին, այսինքն վերաֆինանսավորման տոկոսադրույքն անգամ 10․5 %-ից էլ  ավել էր, որն աշխարհում ամենաբարձր ցուցանիշներից է, սակայն ողջունելի է, իհարկե, որ գոնե վերջին 4-5 տարիներին այդ  տոկոսադրույքն իջել է՝ հասնելով 6․5 %-ի։

Բայց այս խնդիրն ունի  նաև հակառակ կողմ, այսինքն պրոբլեմը ոչ թե վարկերի բարձր տոկոսադրույքների կամ մեծ ծավալով վարկեր տրամադրելու մեջ է , այլ՝ քաղաքացիների ցածր եկամուտների, այսինքն  պետությունն ամեն ինչ պետք է անի, որ իր քաղաքացու եկամուտներն ու վճարունակության մակարդակը բարձրանա, իսկ դրա համար կան  համապատասխան ռեզերվներ»։

 

Մանրամասները՝ տեսանյութում։

  • Դիտումներ՝ *