Լուրեր
Սխալ լոբբինգ․ հակածխախոտային օրենքի հետ կապված ԱԺ-ն վերապահումներ ունի, ինչ է առաջարկում ԱՆ-ն
  • 09:45
  • 2019-11-07
  • Դիտումներ՝ *

«Դու ավելի ուժեղ ես, քան ծխախոտը». սա առողջապահության նախարարության կողմից տարածվող հակածխախոտային գովազդային արշավի կարգախոսն է: Նախարարության կողմից մշակվել է նաև օրենքի նախագիծ: Թեմայի շուրջ զրուցելու համար «Առաջին լրատվական»-ը հյուրընկալել է առողջապահության փոխնախարար Լենա Նանուշյանին և ԱԺ «Իմ քայլը» խմբակցության պատգամավոր Լուսինե Բադալյանին:

Ինչպես նշեց առողջապահության փոխնախարարը, հակածխախոտային պայքարի տարրերից է ոչ միայն օրենսդրական արգելքների սահմանումը, այլ նաև մարդկանց իրազեկվածությունը առ այն, թե որքանով է վնասակար ծխախոտի ծուխը թե՛ իրենց, թե՛ իրենց շրջապատի համար. «Կարծում եմ՝ մենք լայնածավալ աշխատանքներ ենք իրականացրել՝ ծխախոտի ծխի վնասակարության մասին իրազեկելու մեր բնակչությանը»:

Նրա խոսքով՝ իրենց հարցման տվյալներով՝ բնակչության 80 տոկոսից ավելին կողմ է հանրային վայրերում ծխախոտի արգելքին. «Նույն հարցումը ցույց է տվել, որ մարդիկ գիտակցում են, թե իրենց առողջության համար որքան վնասակար է ծխախոտի ծուխը: Այդ բոլոր հիմքերն ունենալով՝ մենք վստահ ենք, որ Ազգային ժողովը նույնպես կքվեարկի ի շահ մեր բնակչության առողջության»:

Լուսինե Բադալյանը տեղեկացրեց, որ Ազգային ժողովի վերաբերմունքը այս հարցի շուրջ դրական է. «Պարզապես մենք ունենք որոշակի վերապահումներ խնդիրների ձևակերպման հարցերում: Իմ անձնական կարծիքով՝ որոշ դեպքերում նույնիսկ ծայրահեղությունների են գնացել»:

Պատգամավորի խոսքով՝ օրենքում կան խնդրահարույց կետեր. «Ինձ համար, օրինակ, խնդրահարույց է այն կետը, որ ծխախոտ հիշեցնող ցանկացած արտադրատեսակի, սննդամթերքի ներմուծումը, արտահանումն ու արտադրությունը արգելվում են»:

Լուսինե Բադալյանը տեղեկացրեց, որ երեկ իրենք այդ հարցի շուրջ փոքր-ինչ բանավիճել են. «Բայց ես ուզում եմ հանրությանը տեղեկացնել, որ երբ մենք ինչ-որ բան ենք քննարկում կամ բանավիճում ենք, չի նշանակում, թե մենք ունենք շատ տարբեր տեսակետներ և թշնամական վերաբերմունք: Մենք քննարկում ենք՝ օրենքը կատարելության հասցնելու համար»:

 

Հարցազրույցն ամբողջությամբ՝ տեսանյութում:

  • Դիտումներ՝ *