«Վարդուհի Իշխանյանի գործով ստուգողական գործընթացներ են տարվում։ Այս պահին հրապարակման ենթակա այլ տեղեկություն չենք կարող հաղորդել»,- «Առաջին լրատվական»-ի հետ զրույցում փոխանցեցին ոստիկանության լրատվական ծառայությունից։
Մեր հարցին՝ ի վերջո, Վարդուհի Իշխանյանը բացատրություն տվե՞լ է այս գործի շրջանակներում, թե՞ ոչ, նույն պատասխանը տվեցին՝ այս պահին հրապարակման ենթակա տեղեկություն չենք կարող հայտնել։
Նշենք, որ երեկ Հանրային խորհրդի նախագահ Վազգեն Մանուկյանի կինը՝ Վարդուհի Իշխանյանը ֆեյսբուքյան իր էջում գրել էր, որ իրեն հրավիրել են ոստիկանության 6-րդ վարչություն՝ բացատրություն տալու, սակայն ինքը հրաժարվել է. «Այսօր՝ նոյեմբերի հինգին, ինձ զանգահարեց ոմն անծանոթ և ներկայացավ որպես ոստիկանության 6-րդ վարչության աշխատող և «հրավիրեց» վարչություն՝ բացատրություն տալու իմ՝ ս․թ․ հոկտեմբերի 30-ի ֆեյսբուքյան գրառման կապակցությամբ։ Պատասխանեցի, որ հրաժարվում եմ ներկայանալ և պարտավոր չեմ բացատրություն տալ (օրենքով բացատրություն տալու պարտավորություն կամ բացատրություն տալու նպատակով ներկայանալու պարտավորություն ոչ ոք չունի)։ Թվաց, թե հարցը սպառված է, բայց ոչ։ Երեկոյան, մոտավորապես ժ․19.10 -ին, մեր բնակարանի շեմին նկատեցի երկու անծանոթների։ Հարցին, թե ովքեր են, պատասխանեցին՝ 6-րդ վարչությունից, և շուրջ 15 րոպե պահանջում էին դուռը բացել և ստորագրել ինչ-ինչ փաստաթղթեր։ Եվս մեկ անգամ մերժեցի՝ բացատրելով մեր «փառապանծ» իրավապահ մարմինների աշխատողներին, որ բացատրություն տալ կամ չտալը իմ իրավունքն է, և որ իրենք իրավունք չունեն ինձնից ստիպողաբար բացատրություն կորզել։ Կարծում եմ՝ ոստիկանները քաջատեղյակ են օրենսդրական կարգավորումներին, ու նման պարագայում այս ամենը ես համարում եմ ոչ միայն «իրավական» ապօրինություններ, այլև սպառնալիքներ իմ և իմ ընտանիքի նկատմամբ»։
Հիշեցնենք, որ պատգամավոր Արման Բաբաջանյանը դիմել էր գլխավոր դատախազ Արթուր Դավթյանին՝ կապված Հանրային խորհրդի նախագահ Վազգեն Մանուկյանի կնոջ՝ Վարդուհի Իշխանյանի գրառման հետ՝ խնդրելով վերջինիցս վերցնել գրավոր հաղորդում և ուսումնասիրել իր ֆինանսական աղբյուրները, ինչպես իր դիմումի մեջ նշել էր Վարդուհի Իշխանյանը:
Իսկ ավելի վաղ, Վարդուհի Իշխանյանն էր ֆեյսբուքյան իր էջում՝ դիմելով գլխավոր դատախազին, խնդրել էր պարզի Բաբաջանյանի ֆինանսական աղբյուրները, որտեղից են նրա շքեղ տունը, հարուստ ԶԼՄ-ն։