Լևոն Հայրապետյանին մոտ կանգնած մեր աղբյուրներից տեղեկացանք, որ վերջին օրերի աղմուկից հետո ռուսաստանաբնակ գործարարը որոշել է դադարեցնել ոչ միայն Գանձասարի պարսպի սալիկապատման աշխատանքները, այլև ցանկացած տիպի բարեգործություն:
Այս որոշումը, մասնավորապես, կայացվել է այն բանից հետո, երբ ԼՂՀ վարչապետ Արա Հարությունյանը հուլիսի 14-ին զանգահարել է աշխատանքները ղեկավարող Վլադիմիր Հայրապետյանին և պահանջել դադարեցնել շինարարությունը: Հիշեցնենք, որ բարերարի եղբայրը կիրակի օրը վանքի տարածքում լրագրողների հետ զրույցում նշել էր, որ նախագահ Սահակյանն աջակցում է իրենց ձեռնարկը և մոտ օրերս պաշտոնական թույլտվություն է լինելու:
Մեր աղբյուրը նշում է, որ Լևոն Հայրապետյանը խիստ վիրավորված է բոլորից, այդ թվում` ԼՂՀ իշխանություններից, որոնք իրեն թույլտվություն չեն տվել, ապա՝ արգելել են շինարարությունը, ճարտարապետներից, ովքեր, ըստ գործարարի, իրենց անձնական շահն են հետապնդել և ցանկացել են իրեն վաճառել վերանորոգման սեփական նախագիծը, եկեղեցուց, որը նույնպես ինչ-ինչ շահեր է ունեցել այս ամենում և հիասթափված է եղել, որ շինարարությունն իրականացնում են այլ մարդիկ, մամուլից, որտեղ բարերարին վանդալ, բարբարոս և անգրագետ են կոչել ու նաև հասարակությունից, որն այդ գնահատականները կիսել է:
Արդյունքում` այն ամենը, ինչ կապված է բարեգործության հետ, ներկա պահին դադարեցված է: Մասնավորապես, կասկածի տակ է Վանք գյուղի մոտակայքում կառուցվելիք ռազմական ուսումնարանի շինարարությունը, զոհված ազատամարտիկների ընտանիքներին, զինվորին, ուսանողներին, հասարակ գյուղացիներին հատկացվող դրամական և այլ օգնությունը, Ստեփանակերտ-Վանք ավտոճանապարհի վերանորոգումը, Գանձասարի գիշերային լուսավորության, հիվանդանոցի և մանկապարտեզի ֆինանսավորումը, ձիարշավարանի կառուցումը և այլն:
