Իրանական միջուկային գործարքի շուրջ տագնապալի իրադրությունն ստեղծվել է այն բանի պատճառով, որ ԱՄՆ-ը ոչ միայն հրաժարվել է իր պարտավորություններից, այլև պահանջում է, որ դա անեն մյուս մասնակիցները: Այդ մասին, ինչպես հաղորդել է TASS-ը, հայտարարել է ՌԴ ԱԳ նախարար Սերգեյ Լավրովը՝ ելույթ ունենալով նոյեմբերի 6-ին կայացած մամուլի ասուլիսում:
«Մենք խիստ անհանգստացած ենք (միջուկային գործարքի շուրջ ստեղծված իրադրությունից), և այդ տագնապն առաջացել է ո՛չ այսօր և ո՛չ էլ երեկ, այլ անցյալ տարվա մայիսին, երբ Միացյալ Նահանգները հայտարարեց այդ պայմանավորվածությունից դուրս գալու մասին»,- ասել է նա:
«ԱՄՆ-ը ոչ միայն չեղյալ հայտարարեց իր սեփական պարտավորությունները, կոպտորեն խախտելով միջազգային իրավունքը, այլև պատժի սպառնալիքներով, պատժամիջոցների ճանապարհով արգելեց աշխարհի մյուս երկրներին՝ կատարելու իրանական միջուկային ծրագրի շուրջ Գործողությունների համատեղ համապարփակ ծրագիրը (ԳՀՀԾ),- շարունակել է Լավրովը:- Դրանով իսկ Վաշինգտոնը, և դա է խնդրի արմատը, բոլորից պահանջեց, որ նրանք ոչինչ չանեն այն ամենից, ինչը բաժին է հասնում Իրանին ԳՀՀԾ-ին համապատասխան: Իրանից պահանջում են առանց բացառության կատարել ամենը, իսկ ի պատասխան ոչինչ չեն տալիս»: