«Պահանջում ենք գիտության ֆինանսավորում» խմբի համակարգող, գիտությունների դոկտոր Արթուր Իշխանյանն այսօր ԱԺ-ում հրավիրված քննարկման ժամանակ կոշտ ելույթով հանդես եկավ՝ ուղղված իշխանություններին:
«Մեկ բառով կարելի է ասել, որ մեր գիտությունը գտնվում է կոմայի մեջ և գնում է մահվան: Անկախացումից ի վեր պահվել է նվազագույն ֆինանսավորման, գոյատևմամբ ռեժիմում, արդյունքում ունենք գիտնականների թվի կրճատում, գիտության ծերացում, ենթակառուցվածքները մաշված են, գիտական հանրությունը հոգնած է»,- ասաց նա:
Գիտնականը ներկայացրեց, որ չպետք է կառավարությանը բացատրել գիտության կարևորությունը, կառավարությունն ինքը պետք է գիտակցի այն, նշեց.
«Ոչինչ բացատրել պետք չէ, ամեն ինչ բացատրված է, և այն կառավարությունը, որին պետք է բացատրել, այդ կառավարությունը ոչինչ չարժի, չի կարելի ստանձնել գիտության պատասխանատվությունը՝ չգիտակցելով դրա կարևորությունը, ուստի եկեք հասկանանք, որ այս կառավարությունը, նաև ցավով եմ ասում, իրեն դիրքավորել է որպես հակառակորդ, այլ ոչ որպես գործընկեր»:
