Ըստ ռուսական Независимая газета թերթի` ԲՐԻԿ անդամ երկրների մեջ, որտեղ են Բրազիլիան, Ռուսաստանը, Հնդկաստանը և Չինաստանը, Ռուսաստանն ամենացածր տնտեսական ցուցանիշներն ունի: Այս մասին անցած շաբաթ հայտնել է Ռուսաստանը: Եվս մեկ փաստ, որին ուշադրություն է դարձրել վիճակագրական այդ ծառայությունը, կապիտալի արտահոսքն է և ներդրումների պակասը: Հունվար-սեպտեմբերին ներդրումները Ռուսաստանում կրճատվել են 13%-ով: Այս տարվա հաշվետու ժամանակաշրջանում ռուսական տնտեսությունում օտարերկրյա ներդրումները կազմել են 47.488 մլրդ դոլար, ինչը անցած տարվա հունվար սեպտեմբեր ամիսների համեմատ նվազել է 13,2%-ով:
Բարձրագույն տնտեսական դպրոցի ղեկավար Եվգենի Յասինի խոսքերով, աշխարհում ներդրումների հետ կապված լուրջ խնդիրներ կան: Ռուսական տնտեսությունն, անկասկած, հետաքրքրում է ներդրողներին, սակայն գործարարների մոտ մտահոգություններ կան ներդրումային մթնոլորտի, բիզնեսի և պետության փոխհարաբերությունների առումով: Յասին հիշեցրել է ռուսական կապիտալի արտահոսքի վերաբերյալ: «Հայրենական բիզնեսի այսօրինակ պահվածքը ազդանշան է իշխանությունների համար. պետք է հստակ պահել քաղաքական գիծը, բիզնեսի համար հարմար մթնոլորտ ստեղծել»,- ասել է փորձագետը: Իսկ այս պահին Ռուսաստանի տնտեսությունում տեղի է ունենում լճացում, ինչը նաև ներդրումների պակասի հետևանք է: «2–3%-անոց աճը բնորոշ է զարգացած երկրներին, այլ ոչ թե «երիտասարդ շուկայական տնտեսություն» ունեցող երկրին»,- ասել է Յասինը:
Մեկ այլ փորձագետի` Վալերի Միրոնովի կարծիքով, կապիտալի արտահոսքը Ռուսաստանից պայմանավորված է ինչպես համաշխարհային, այնպես էլ ներռուսաստանյան գործընթացներով: Ըստ նրա` մինչև ճգնաժամը ներդրողները շահագրգռված էին ոչ միայն ստացվող բարձր եկամուտների պատճառով, այլև ռուսական արտարժույթի ամուր դիրքերով: Այս պահին ռուբլին թուլանում է, և հնարավոր է, որ դա շարունակվի նաև ապագայում, և հին մոդելն այլևս չի կարող գործել: Այդ պատճառով ներդրումների առումով Ռուսաստանը չի կարող մրցակցել Չինաստանի, Հնդկաստանի և Բրազիլիայի հետ, որոնք ունեն լուրջ առավելություն, օրինակ` էժան աշխատուժ: Ռոսստատի տվյալներով, ռուսական ՀՆԱ-ն երրորդ եռամսյակում անցած տարվա նույն ժամանակահատվածի համեմատ աճել է 2,7%-ով, մինչդեռ Հնդկաստանում և Բրազիլիայում` 8,8% և 8,7%-ով համապատասխանաբար: Չինաստանը նույն ժամանակահատվածում աճել է 10,6%-ով: Ռուսաստանը նաև բացասական ցուցանիշներ ունի սղաճի առումով: Այս տարի այն արդեն կազմում է 7%, մինչդեռ Չինաստանում այն կազմել է 3,6%, Բրազիլիայում 4,7%, ԱՄՆ-ում` 1,1%, գերմանիայում` 1,3%. Միայն Հնդկաստանում այն ավելին է եղել Ռուսաստանից` կազմելով 9,8%:
