Երեկ Դոնեցկի մարզի Սլավյանսկ քաղաքի մուտքի մոտ ակտիվացած մի խումբ անհայտ զինյալների և քաղաքաբնակների միջև բախումների և լարված իրավիճակի հետևանքով մահացել է ազգությամբ հայ երիտասարդ Ռուբեն Ավանեսյանը: «Առաջին լրատվական»-ի հետ զրույցում այս մասին տեղեկացրեց Ուկրաինայի Լուգանսկ և Դոնեցկ մարզերի հոգևոր հովիվ Տ. Հուսիկ քահանա Նուրիջանյանը:
Հիշեցնենք, որ անհայտ ծագմամբ զինյալներն անցակետ էին հիմնել քաղաքի մոտ, ամրացրել այն բարիկադներով և իրենց հսկողության տակ վերցրել տրանսպորտի ելումուտը քաղաք: Խմբի անդամներից ոմանք զինված են ինքնաձիգներով, ոմանք էլ միայն ատրճանակներով:
Ուկրաինական լրատվամիջոցների փոխանցմամբ՝ անցակետը տնօրինող այդ մարդկանց գործողությունները շատ նման են Ղրիմում հայտնված «կանաչ մարդուկների» գործողություններին, որոնց հետևում էր ռուսական զինուժի ներթափանցումը կարևոր օբյեկտներ: Ավելի վաղ մի այսպիսի խումբ գրավել էր Սլավյանսկի շրջանային ոստիկանության շենքը, որից հետո Ուկրաինայի ՆԳՆ ղեկավար Արսեն Ավակովը խոստացել էր դիմել կոշտ միջոցների, որի արդյունքում էլ ավելի էր սրվել քաղաքում ստեղծված իրավիճակը:
Տեր Հուսիկը տեղեկացրեց, որ երիտասարդի մահվան հանգամանքները դեռևս ճշտվում են, քանի որ վարկածները տարբեր են: Նրա որակմամբ՝ երիտասարդը քաղաքականությամբ չի զբաղվել, քաղաքում երկու մասի բաժանված բևեռներից որևէ մեկի կողմը հարելիս չի եղել:
«Երկու կարծիք կա, որոնցից մեկի համաձայն՝ նա մեքենայով գնալիս է եղել անցակետի մոտով, կանգնեցրել են, չի կանգնել, ու գրոհայինների կողմից կրակ է բացվել նրանց ուղղությամբ: Այս ամենը դեռ ճշտվում է: Ծնողները գնացել են դին վերցնելու, թույլ չեն տվել, վերահսկողական կետեր են տեղակայված, ոչ մուտք, ոչ ելք կա:
Երկրորդ վարկածն այն է, որ երբ կրակոցներից հետո մոտեցել են, երիտասարդի մարմինը սառն է եղել, այսինքն՝ միանգամից չէր կարող սառել մարմինը. կարծիք կա, որ ավելի վաղ է մահացած եղել, և այդտեղ են բերել: Այսինքն՝ ճշտելու կարիք կա»,- տեղեկացրեց Տեր Հուսիկը՝ հավելելով, որ փորձում են երիտասարդի դին ստանալ դիահերձարանից: Ըստ նրա՝ դեռ որոշ բարդություններ կան:
